– Sukseassa, muhto ii leat jurdda lágidit boahtte jagi
Mannan vahkkoloahpa lágiduvvui GLR Live Guovdageainnus. Olbmot ledje duđavaččat, muhto lágideaddji ii dieđe šaddá go mihkkege boahtte jagi.
GLR redaktevra Nils Martin Kristensen muitala iežas diibmá miessemánus ožžon jurdaga lágidit neahta bokte konsearttaid, nu go olu eará mediat maid leat dahkan.
– Muhto de áššit rivde ja danin šattai nu go šattai, ja mun gal lean hui duđavaš dainna. Dát šattai olu buoret go konsearta neahta bokte livččii šaddan, muitala Kristensen.
Son dadjá ahte lei hui buorre mokta ja buorre dálki dan beaivvi, nu ahte sus ii leat mihkkege maid moaitá.
Ávvirii lei dadjan ovdal doaluid ahte ledje gergosat váldit vuostá vaikke 500 olbmo. Kristensen jáhkká ahte doaluin fitne badjelaš 300 olbmo, muhto ii dieđe juste logu.
Ii dieđe šaddá go boahtte jagi
Go Ávvir jearrá lea go jurddašan boahtte jagi lágidit sullasaš doaluid, de ribaha čaibmat: – Mii oaččuimet koronaruđaid, buoret ruhtadeami go dábálaččat korona dihtii. Ja de ráhkadeimmet dán stuorát go galggai álggus, nu ahte dan in jáhke. Buohkat bohte ja dadje munnje olles eahkeda ahte dákkár doalut galggašedje lágiduvvot maid boahtte jagi, dadjá son.
Son muitala ahte olbmot sáhttet álgit bargat ja de oaidnit šaddá go mihkkege boahtte jagi. – Lea álki sávvat, mun maid sávan, muhto lea hui olu bargu. Soaitá earáin lea jurdda dása, muhto in mun dieđe, ferten oaidnit, dadjá son.
Ožžon olu doarjaga
– Buoremus lea go sihke Sámediggi, Sparebanken ja Mediabearráigeahčču leat dorjon, ja háliidan giitit sin go leat addán ná olu ruđa midjiide. Sii leat ruhtadan eanemusat, muitala Kristensen.
Son dadjá ahte ii leat okto bargan doaluiguin, ja lea ožžon olu buori veahki.
– Ollu giitu buohkaide geat veahkehedje earret eará váktan ja guoddinveahkkin, ja sii geat leat ordnen visot. Hui buorre bargu sis. Lean áibbas duhtavaš, buot manai buorebut go leimmet vuordán. Lei hirbmat buorre jietna maid konsearttas ja sáddagis ledje buori govat ja buorre jietna doppe maid, loahpaha Kristensen.