Greta Thunberg doarju Nussir vuostálastiid
– Lea stuorra ávki. Thunbergas han lea 11 miljovnna čuovvoleaddjit miehtá máilmmi. Son ii fitnan Riehppovuonas, muhto ášši lea su miela mielde, lohká aktivista Beaska Niillas.
Máilmmi beakkán dálkkádataktivista ja skuvlaoahppi, 18 jahkásaš, Greta Thunberg doarju iežas Twitter-siiddus Riehpovuona aktivisttaid geat vuostálastet Nussir veaikeruvkke ásaheami ja ruvke áigumuša leiket ruvkebázahusaid Riehpovutnii. Son čállá vaikko Riehppovuotna lea suddjejuvvon luossavuotna, de lea Norgga ráđđehus addán Nussir ruvkii lobi leiket 2 miljovnna tonna mirkobázahusaid vutnii jahkásaččat.
– Dát váikkuha báikkálaš guollebivdui mii lea hirbmat dehálaš mearrasámi kultuvrii ja šaddá Norgga eiseválddiid nuppi falleheapmi. Ruvkefitnodat lea plánen ásahit ruvkke bohccuid váldoguottetbáikái mii lea dehálaš bohccuide. Riehpovuonas lea vuostálastin báiki gos olu vuostálastit vuostálastit, čállá Tunberg.
Ávvir ii fáhten Thunberga ságaide.
Beakkalmasat fuopmášuhttet olusiid
Beaska Niillas muitala son ii leat leamaš olles áiggi Riehpovuonas, muhto son lea oaidnán Greta Thunberg doarjumin sin Twitteris ja lohká dat mearkkaša olu go nu dahká. Muhto Greta Thunberg ii fitnan Riehppovuonas Lohká Thunberg háliidii sin doarjut ja nu sii sáddejedje duogášdieđuid Thunbergii man vuođul son lea almmuhan dieđuid Twitterii.
– Greta Thunbergas lea 11 miljovnna olbmo geat čuvvot su Twitteris. Min hástalus leamaš máŋga jagi olahit daid stuorra mediaid miehtá máilmmi muitalan dihte dan boasttuvuođa mii lea dáhpáhuvvamin dáppe. Go beakkalmasat dorjot min, de lea dat ávki go dat buktá fuomášumi. Eambbo olbmot besset gullat man endorii Norgga politihkka lea, lohká Beaska Niillas.
Son čilge go beakkalmasat fitnet dahje dorjot sin, nugo Mari Boine, de ožžot eanet olbmot gullat sin birra.
– Beakkalmasaid bokte besset eanet olbmot gullat ášši birra geat ovdal eai leat gullan dan. Ulbmil lea nu áŋgiruššat ovdabeale válggaid ahte guovddáš eiseválddi politihkkarat gesset ruovttoluotta daid lobiid. Diet lobit eai leat čállon geađgái, dadjá Beaska Niillas.
Dálkkádat ja luondu
Therese Hugstmyr Woie čilge sin mielas ii heive ásahit veaikeruvkke mii váikkuha hejot sihke eamiálbmogii ja ekovuogádahkii.
– Greta Thunberg doarjja lea dehálaš go mii oaivvildat ii galgga leat riidu gaskal dálkkádaga ja luonddu. Mii dárbbašat guhkit áiggi čovdosa, eatge oanehisbotta čovdosa. Midjiide lea buorre go Greta Thunberg lea minguin ovttaoaivilis. Lea maid buorre signála, lohká Therese Hugstmyr Woie.
Son muitala ahte vaikko Nussir jođiheaddji Øystein Rushfeldt lea ovttaoaivilis singuin olu áššiin, de lohká Rushfeldt ahte veaikeruvke lea áibbas dárbbašlaš ja čilge dies juohkásit bealit iešguđet oaiviliidda.
– Ekovuogádat lea juo garra deattu vuolde go ruoššaluossa duvdá eret Atlánta luosa. Gierdá go vuotna ahte ruvkebázahusat dasa velá leikejuvvojit? Lea hirbmat buorre go beakkálmasat, nugo Marie Boine, geavahit iežaset váikkuhanvejolašvuođa min doarjut ja nu eastadit ruhtadeaddjiid investeremis Nussir ASAI, lohká Woie.
Ásahan čoahkkanangohttenbáikki
Lea báikkálaš aktivista ja Sosiála gurotbellodat, Norgga Sámiid Riikkasearvi (NSR), Natur og Ungdom (Luondu ja nuorat) ja Naturvernforbundet Vest-finnmark (Oarje-finnmárkku Luonddugáhttenlihttu) searvvit mat ovttasráđiid leat soahpan cegget tealtaleairra Riehpovutnii geassemánu 23.beaivvi rájes gitta válgabeaivái, čakčamánu 13. beaivái. Lea organisašuvdna Stopp Nussirgruva – Redd Repparfjord mii lágida tealtaleairra gosa buot vuostálastit leat buresboahtin.
– Plánejuvvon veaikeruvkkes Riehppovuonas Finnmárkkus váikkuha menddo olu vuona guollenáliide ja boazodollui mii lea juo ovdalaččas garrasit gáržžohallan. Dán tealtabáikái čohkket mii birasaktivisttaid, guollebivdiid, badjeolbmuid ja sámi aktivisttaid. Ovttasráđiid áigut mii čájehit politihkkariidda, ruhtadeaddjiide ja ruvkefitnodahkii Nussir ASAI ii leat nu álki álggahit álgobargguid dán geasi, čálle lágideaddjit árrat dán geasi.