Logi jagi maŋŋel terrorfalleheami
Dán duorastaga, suoidnemánu 22. Beaivvi lea logi jagi dassái go Norga vásihii dan stuorámus terrorfalleheami 2. máilmmisoađi rájes. Suoidnemánu 22. Beaivvi 2011:s bávkaluvvui bomba ráđđehuskvartálas Oslos ja moadde diimmu maŋŋel fallehii terrorista nuoraid geat ledje Auf-geasseleairras Utøyas olggobealde Oslo. Badjel 500 Bargiidbellodaga nuora ledje sullos go terrorista báhčališgođii.
77 čieža olbmo gottáhalle dán guovtti falleheamis. 33 dáin ledje vuollel 18 jagi boarrásat. Oallugat roasmmehuvve garrasit. Oadjebas Norga ii leat šat nu oadjebas. Dát lei surgadis dáhpáhus mii darvánan buohkaid muitui. Ávviris lea ge dán vahkku juohke aviissas fáddán terrorfalleheamit ja dan vaikkuhusat olbmuide ja servodahkii.
Mii, geat eat lean doppe ja geat eat dárbbašan oaidnit ja gillát, mii leimmet suorganan ja ballán. Mii logaimet ja gulaimet nuoraid garra vásáhusaid birra. Daid govaid ja muitalusaid lea váttis vajáldahttit ja geahččalit ipmirdit mo sidjiide lei geat ledje guovdu ja gasku terrorfalleheami šadde gillát. Otná Ávviris leat ge mis jearahallan sámegánddain Tarjei Jensen Beckain gii lei Utøyas ja bážáhalai go terrorista fallehii nuoraid. Son lei dalle 19 jagi boaris. Son roasmmehuvai garrasit. Son lea oahppan eallit bákčasiiguin, muhto dovdá dan seamma maid olu eará nuorain geat vásihedje terrordaguid, namalassii ahte lea ožžon buori veahki fysalaš vahágiid ektui, muhto psyhkalaš dearvvašvuođa veahkki gal leamaš váilevaš. Nuorat leat maŋŋel dán roavva dáhpáhusa olu moaitán go eai leat ožžon veahki maid livčče dárbbašan. Dattetge eai leat veahkkebálvalusat nagodan dustet sin ja dat lea cuiggodanveara.
Vaikko dál eallá sihke rumašlaš ja psyhkalaš bákčasiiguin, de ii leat dat hehtten su politihkalaš áŋgiruššama. Su mielas lea maid dehálaš muitalit suoidnemánu 22. beaivvi vai eastadivčče sullasaš dáhpáhusaid boahtteáiggis.
Juo dalle 10 jagi áigi lei hui čielga diehtu ja oaidnu dán ášši ektui; mii eat galgga jávohuvvat eat ge vajáldahttit. Dál logi jagi maŋŋel lea áigi bisánastet ja smiehtastit ahte leat go mii leamašan doarvái čeahpit bargat daid jurddašanvugiid ja guottuid vuostá mat ledje terrorista daguid vuođđun. Vuhtto go min servodagas ahte mii eanet eastadit vaši ja rasismma? Leat go eanet gierdevaččat ja fátmmastit máŋggabealatvuođa? Ain odne vuhtto Norggas seamma vašši ja ideologiija go terroristtas lei. Seamma dehálaš go muitit terrordaguid, lea dáistalit daid jurddašanvugiid ja guottuid vuostá mat dákkár terrordaguid duogábealde leat.
...dáistalit daid jurddašanvugiid ja guottuid vuostá mat dákkár terrordaguid duogábealde leat