Oaivvildit dásseárvvu barggu Norggas bisánan
Earret stuorra hástalusat mat gusket veahkaválddálašvuođa nissoniid vuostá ja uhcán nissonat bajimus jođiheaddjivirggiin, de oaivvilda Norgga ráđđehus ahte galgat leat duhtavačča sohkabeliid dásseárvvuin Norggas.
«Eat áibbas», lohká Sex og Politikk searvi mii árvvoštallá Norgga ceavzilvuođamihttu 5 bisánan.
Suoidnemánu 14. beaivvi almmuhii Norga iežas raporta riikka ceavzilvuođa barggu mihttomeriid Ovttastahttojuvvon Našuvnnaide (ON) .
Earret Norgga eiseválddiid raporta, de lea bargojoavku mas leat mielde 18 searvvi mat barget dásseárvvu bargguin nationála ja riikkaidgaskasaš dási, ráhkadan nu gohčoduvvon suoivvanraporta mas árvvoštallet Norgga barggu. Bargojoavkku mielas lea dásseárvu bargu bisánan. Suoivvanraporta čujuha dáid beliide maid fertet čađahit, jus galggaš ávki dásseárvobargguin. * Nannet barggu eastadit buot veahkaválddálašvuođa nissoniid ja nieiddaid vuostá, maiddái digitála lávddiin.
* Čuovvulit Istanbul-soahpamuša mii lea eastadit veahkaválddálašvuođa nissoniid vuostá lagaš oktavuođain.
* Ásahit ođđa doaibmaplána veahkaválddálašvuođa vuostá mii dáhpáhuvvá ruovttuin.
* Ásahit ođđa mieđihanlága, dahje gieldit buot seksuála doaimmaid jus ii leat miehtan ráŋggáštuslágas.
* Vuolláičállit Ilo-soahpamuša veahkaválddálašvuođa ja loavkašuhttima vuostá, ja mearridit ILO rávvaga nummar 206.
* Sihkkarastit nana dásseárvoperspektiivva sihke nationála ja riikkaidgaskasaš politihkas maŋŋá pandemiija ja bargat politihkalaččat dan nammii ahte ođđa bargosajit álggahuvvojit, sihkkarastit bargiid vuoigatvuođaid ja geahpedit tienaserohusaid.
* Nanusmahttit barggu oaidnit mo muhtin suorggit servodagas ožžot fámu ja earát eai, iige ráddjet doaimmaid ja dásseárvvo politihka guovtte suorat mállin.
* Čuovvolit NAČ 2019:19 Norgga raporta mánáid ja nuoraid dásseárvohástalusaid birra, ja juolludit doarvái ruđaid eastadit sohkabeali erohusaid go válljejit oahpahusprográmmaid ja fidnooahppu.
* Ollašuhttit geatnegasvuođa mii cealká ahte 50 proseantta olgoriikka doarjjaveahkehemiin galget nissoniid vuoigatvuođat ja dásseárvu leat juogo váldo- dahje oassemihttomearrin.
*Ovdánahttit feministtalaš olgoriikkapolitihkka vai norgalaš veahki mii geahpedivčče sohkabeliid erohusaid.
Sex og Politikka eaktodáhtolaš searvvi jođiheaddji Tor-hugne Olsen lohká ahte vaikko Norga lea guhkás joavdan dásseárvo áššiin eará riikkaid ektui, de lea olu bargu báhcán čoavddekeahttá Norggas.