Dál lea áigi boazodoallohálddašeami geahčadišgoahtit
Dán vahkkus beakkehii ahte Stáhtahálddašeaddji boazodoalloossodat lea sádden priváhta olbmui eará boazosápmelaččaid čiegus dieđuid. Das lea sáhka ahte Stáhta hálddašeaddji lea addán muhtun olbmui badjel 60 siidooasi boazologuid, man ollu bohccuid lea vuovdán, doarjagiid birra ja nu ain. Dat dieđus lea áibbas dohkketmeahttun dákkár dieđuid juohkit priváhtaolbmuide. Diehttelasaid ii leat Stáhtahálddašeaddji dan dahkan mieleavttus, muhto lea geavvan dáhpedorpmis.
Dan duođašta maiddái Romssa ja Finnmárkku stádahálddašeaddji boazodoallodirektevra Sunna Pentha. Son mieđiha ahte sis leat leamaš beare heajos dábit mot dákkár dieđuid gieđahallet, ja lohpida buoridit iežaset rutiinnaid dan dáfus. Pentha lohká ahte sii eai juoge šat boazologuid ja dakkár dieđuid e-boasttas, muhto boazodoalu ovddasteaddjit galget ieža boahtit daid viežžat. Dasa mii veahá reageret, ahte go Stáhtahálddašeaddji dušše mearrida ásahit ain váddáseappo dili boazosápmelaččaide go ieža leat roavvat meaddán. Šaddá ge oalle guhkes ja moalkkas mátki ollu boazosámiide háhkat dákkár dieđuid go šaddet ieža viežžat daid kontuvrrain. Orro dan láhkai ahte Stáhtahálddašeaddji dušše duvdila boazosámiid ala dan go ieža leat meaddán ovdalii go buoridit iežaset bargodábiid.
Ii ge dát ášši leat vuosttaš heajos beaggin Stáhtahálddašeaddji birra dan geasis, go olusiid doarjjaohcamiid eai leat ollen meannudit rievttes áigái. Dasa lei álgosivva go bargit leat luomus, muhto maŋŋel go olusat dan moite, de rievddai ákka danin ahte olu ohcamiin váilot dieđut. Dat sáhttá dan láhkai, muhto dan olis čuožžila gažaldat ahte hálddašuvvo go boazodoallu dasto detáljadásis? Lea maid leamaš debáhtain dat, ahte boazodoallit eai oaččo ollislaččat buhtaduvvot biebmangoluid mat ledje diimmá goavi dihte. Dat ge lea dakkár ovdamearka mii nanne dan ahte boazodoallu stivrejuvvo stáda bealis garra gieđain.
Dál lea ge áigi geahčadišgoahtit boazodoallohálddašeami vai boazosápmelažžii šaddá álkit leat ealáhusdoaimmaheaddjin. Vuosttaš lea dat, ahte sáhttá go dahkat álkibun rapporterengeatnegasvuođa, nu go ovdamearkka dihte boazologuid, dietnasiid, vuovdimiid, niestebohccuid ja nu ain dieđihemiid eiseválddiide. Seamma guoská maid dieđus boranávdeohcamiidda. Dávjá orro ge dan láhkai, ahte stáhtaeiseválddiin lea unnán luohttámuš boazosápmelaččaide, go nu garrasit hálddašit boazodoalu hirbmat stuora hálddašanapparáhtain vaikke dan stuora oktavuođas lea dušše mikroealáhus. Lea maid dárbu geahčadit lea go dál áigi sirdit olles boazodoallohálddašeami Sámedikki vuollái.
Dál lea ge áigi geahčadišgoahtit boazodoallohálddašeami vai boazosápmelažžii šaddá álkit leat ealáhusdoaimmaheaddjin.