Fefo giissás ruhta nannet ássanmovtta
Fefos lea ođđa doarjjaortnet Finnmárkkus. Doarjjaortnet, man leat gohčodan «Giisá», galgá arvvosmahttit ássanmovtta ja doaimmaid luonddu ja kultuvrra eavttuid vuođul.
– Finnmárkku ássit leat eanaeaiggádat. Lea min bargu hálddašit luonddu sin bealis ja hálddašeami árvu galgá boahtit ássiide buorrin. Dan dihte leat mii ásahan «Giisá» nammasaš doarjjaortnega, lohká Fefo direktevra, Jan Olli.
Čieža doarjjasuorggi
«Giisá» fátmmasta čieža doarjjasuorggi: Fefo ruoná doarjagat, Fefo ovttasbargu, Fefo sponsor, Fefo luossajogat, Fefo vuođđostruktuvrra, Fefo meahcásteapmi ja Fefo Finnmárkoláhka.
– Njeallje dain leat juo leamaš guhká mis, muhto ruhtalánat vuođđostruktuvrra, árbemáhtu ja Finnmárkolága ovddideami várás gal leat ođđasat. Mii háliidit čalmmustahttit buot dáid doarjjaortnegiid oktan, ja nu leat čohkken daid «Giissá» sisa vai lea álkit ohcat daidda, lasiha Olli.
4,2 miljovnna ruvnno
Olli čilge ahte Fefo ii galgga doalahit stuora badjelbáza luondduhálddašeamis, muhto addit daid viidáset servodatávkkálaš ulbmiliidda Finnmárkkus – nu go Finnmárkoláhka gáibida ge.
Dán jagi lea «Giissás» oktiibuot 4,2 miljovnna ruvnno. Olli čilge ahte Fefo stivra mearrida jagis jahkái bušeahttareguleremiid bokte man olu galgá várrejuvvot «Giisái».
– Doarjja dehálaš, erenoamážit pandemiija áigge
Nordkapptrappa prošeakta lea ožžon miljovnna ruvnno dán ođđa Fefo doarjjaortnega bokte.
– Sponsor- ja doarjjavejolašvuođat eai leat nu beare valjit Finnmárkkus. Mii oaidnit ahte muhtun sponsorat leat vel bissehan doarjagiid pandemiija áigge. Lei dehálaš ahte Fefo attii árat muttos miljovdna ruvnno Nordkapptrappa prošektii. Oktan Repvåg Kraftlaga 600 000 ruvnno lea dat doarjja dagahan ahte prošeavttas šaddá boađus, ja eambbosat leat dál lohkan iežaset áigut searvat, lohká Jan Morten Hansen Honnesvági Turn ja Falástallansearvvis – HTIFS.
Edelh Ingebrigtsen, Nordkapp og Omegn Turlaga ruhtadoalli, lea ovdal searvan prošeavttaide mat leat ožžon ruđa Fefo ruoná doarjagiid bokte.
– Smávit joavkkut ja searvvit, nu mo mii, šaddet agibeaivvi leahkit doarjjaortnegiid duohken oažžut doaimmaid johtui. Mii leat maiddái fuomášan ahte pandemiija áigge ii leat šat seamma álki oažžut doarjagiid ja sponsorruđaid. Dán vahkku fievrriduvvojit fiellut Keaisváhkái, gos galgat cegget gapahuka Fefo juolludeami vehkiin. Dat lea buot ovddemuš gapahuka mii ceggejuvvo Máhkarávjju almmolašvuođa várás. Mii leat rámis go Keaisvági gili- ja faláštallansearvi duohtandahká dán prošeavtta Keaisvágis, maid mii jáhkkit šaddat hui bivnnuhis olgodaddanfálaldahkan Davvinjárgga suohkanis, loahpaha Ingebrigtsen.