Nuorat dárbbašit buriid ja oadjebas astoáigefálaldagaid

Rukses Ruossa áŋgiruššai jagi 2019:s álggahit nuoraidklubba fas Kárášjohkii, ja nu árvaledje láigohit ovddeš Rypa olgobáikki, man Scandic hotealla eaiggáduššá. Váldoulbmil lei ásahit nuoraide báikki gosa besse čoahkkanit. Dan oktavuođas várrii maiddái Kárášjoga gielda 20 000 ruvnnu nuoraidklubbii ja áigumuš lei ahte gielda galgá ruđalaččat doarjut klubba boahtteáiggis. Rukses Ruossa bijai 40 000 ruvnnu nuoraidklubbii, ja leage ovttas nuoraiguin ja váhnemiiguin bidjan olu návccaid ođasmahttit vistti, oastán viessodávviriid ja spealuid nuoraide.

Njukčamánu 12. beaivvi 2020 giddejuvvui Norga korona geažil eaige sii beassan rahpat nuoraidklubba, vaikko ledje bidjan vaikko man olu áiggi dasa. Dál lea Rukses Ruossa šaddan giddet ja loahpahit nuoraidklubba rahpama, dan sivas go Kárášjoga gielda ii leamaš mielde ruhtadeamen nuoraidklubba viessoláiggu.

Lea áibbas dohkketmeahttun go gielda ii áŋgireappot beroš vuoruhit iežaset márkana nuoraidklubba. Dat čuohcá Kárášjoga nuoraide geain eai leat astoáigefálaldagat. Vaikke Kárášjogas leat oalle buorit valáštallanfálaldagat mánáide ja nuoraide, de eai sáhte dušše dasa duhtat go buot nuorain ii leat beroštupmi valáštallamii. Daid nuoraid orru ge Kárášjoga gielda dávjá oalát vajálduhttimin. Jođánit sáhttá šaddat dakkár áddejupmi ahte gildii eai leat nu dehálaččat dat nuorat ja mánát geat eai leat mielde iešguđet valáštallamiin.

Eai ge Kárášjoga gielddas leat leamaš ráhpa fálaldagat sidjiide geat eai valáštala, dadjalassii ii leat ge eará go nuoraidklubba mii muhtumin álggahuvvo ja fas heaittihuvvo. Danne jáhkkimis ii leat goasse šaddan albma deaivvadanbáikin nuoraide go álot lea leamaš dat fálaldat eahpesihkkaris dilis. Buot nuoraide berre ge leat gielddas juogalágan fálaldat mii doaibmá, nu ahte nuoraidklubba ii sáhte vuoruhit eret, muhto baicce nannet dan doaimmaid vai šaddá gelddolažžan eambbo nuoraide geavahit dan fálaldaga.

Mii ávžžuhit gieldda buorebut beroštišgoahtit nuoraid áššiin, erenomážit go diehtit narkotihkkageavaheapmi lassána nuoraid birrasiin maid. Dat lea ge maid suohkana ovddasvástádus, váldit vára buot ássiin. Lea ártet go dalle go ruhtadilli hedjona, de lea álkimus politihkkariidda ja hálddahussii vuoruhit eret nuoraid geat leat min boahtteáigi. Dat ii váldde lági, ahte nuorat fertejit miehtá márkana leandit, jus áigot deaivvadit, dušše danne go dat okta deaivvadanbáiki mii sis lei, lea gitta. Gielda berre ge váldit duođas dan go jugešvuohta ja narkotihkka nuoraid gaskkas gávdno. Vuosttaš lávki lea rahpat fas deaivvadanbáikki nuoraide, ja ráhkadit buori sisdoalu dohko.

Mii ávžžuhit gieldda buorebut beroštišgoahtit nuoraid áššiin, erenomážit go diehtit narkotihkkageavaheapmi lassána nuoraid birrasiin maid.