Gearggus ásahit «Muohtačalmmit 2» ovttasbarggu Sámedikkis
NSR arvat stuorát go eará bellodagat
Silje Karine Muotka lea gearggus cegget stivrejumi ja dakko bokte ásahit «Muohtačalmmit 2» ovttasbarggu.
HUPMÁ BUOHKAIGUIN: Guovddášbellodaga šiehtadallanjoavkku jođiheaddji, Svein Oddvar Leiros, lohká sin hupmat vaikke geainna Sámedikkis. Govven: Kila Anti (vuorkágovva)
GEARGGUS: Jus NSR riŋge, de lea ÁJSL njunuš Berit Marie P. Eira gearggus vástidit telefovnna. Govven: Nils Johan Vars (vuorkágovva)
Jus boađus šaddá dál nu go orru leamen, de lea čielggas ahte boahtte njeallje jagi leat njealje unnit bellodaga Sámedikkis mannan áigodaga ektui, go sihke Árja, Olgeš, Ovddádusbellodat ja Guovdageainnu Dáloniid listu eai beasa boahtte njealji jahkái Sámedikkis leat.
Nordkalottfolket orru oažžume olles ovcci áirasa Sámediggái, Bargiidbellodat čieža ja Guovddášbellodat fas golbma áirasa. Dasa lassin Sámeálbmot Bellodat ovtta ja Ávjovári Johttisápmelaččaid (JSL) listu maid ovtta.
Gearggus riŋget
Okta diŋga mii lea čielggas lea ahte Norgga Sámiid Riikkasearvi (NSR) šaddá vuot stuorimus bellodahkan,
ja presideanta evttohas Silje Karine Muotka mieđiha ahte sis lea buorre válgaboađus, jus nu doallá go dál lea.
NSR:S leat de 18 áirasa, ja čielgasit stuorimus bellodat Sámedikkis ja buorre vejolašvuohta cegget eanetlogu. Sin ovttasbargoguimmiin, Guovddášbellodagas (Gb) ja Ávjovári Johttisápmelaččaid listtus (JSL) leat siste dál golbma ja okta áirras. Jus sii soabadit ovttasbargat fas, de lea sis eanetlohku cegget Sámedikki stivrejumi boahtte njealji jahkái.
Muotka mieđiha leat vejolažžan ahte sii ovttasbarget dainna guvttiin bellodagain maid boahtte njeallje jagi.
– Midjiide lea hui lunddolaš ahte mii váldit oktavuođa singuin, go mis lea hui buorre ovttasbargu leamašan maŋemus njeallje jagi, lohká son.
Áigumuš
NSR šiehtadallanjoavkkus lea juo leamaš vuosttaš čoahkkin, ja sis lea maid riikastivrras fápmudus álgit šiehtadallat bellodagaiguin vejolaš ovttasbarggu cegget. – Nu «Muohtačalmmit 2» sáhttá hui fargga duohtan šaddat?
– Mis lea čielga plána cegget eanetlogu, dan in áiggo šiitit ge, muhto ii leat vuos mihkke formálalaččat dahkkon, lohká son.
Politihkka deháleamos
Gáisi válgabiirre Guovddášbellodaga njunuševttohas ja šiehtadallanlávdegotti jođiheaddji, Svein O. Leiros, lea duhtavaš válgabohtosiin.
Son ii mieđit álggos ahte sii leat gergosat cegget «Muohtačalmmit 2» ovttas NSR:IN, ja lohká sidjiide leat politihka deháleamosin.
– Midjiide lea deháleamos ahte mii oažžut nanu Gb-politihka ovttasbarggus, nu mii leat gergosat buohkaiguin hupmat, lohká son.
– NSR presideantaevttohas Silje Karine Muotka logai ahte sidjiide lea lunddolaš dálá ovttasbarguguimmiiguin hupmat ja leat gergosat dan maid dahkat. Lea go didjiide dat maid lunddolaš?
– Mii leat luohtehahtti bellodat dakko bokte ahte galgá Gb-politihkka čuovgat ovttasbarggus, dan leat mii jienasteddjiide lohpidan. Nu mii sáhttit buohkaiguin ovttasbargat beare mii olihit nanu
Gb-politihka ovttasbargošiehtadusas, lohká son.
Sáhttet jorgalahttit
Leiros namuha maid ahte sii Guovddášbellodagas leat dál dakkár dilis ahte sii sáhttet jorgalahttit ovttasbarggu measta vaikke gii vuolggášii ovttasbargui singuin.
– Mii leat jorgalahtti posišuvnnas dál goappašat leairraid dáfus, nu mii hupmat buohkaiguin.
– Lea go nu ahte dii ovttasbargabehtet vaikke geainna, beare din politihkka lea ovttasbarggus nanus?
– Mii sáhttit buohkaiguin ovttasbargat. Dat gii fállá midjiide