Hirpmástuvvan go boazoealáhus ii leat bovdejuvvon mielde bargui
Eanandoallodirektoráhtta lea bovden stáhtahálddašeddjiid ovttasbargui geahčadit mo boazodoallohálddašeaddjit čovdet iežaset barggu. NBR politihkalaš jođiheaddji Inge Even Danielsen moaitá sakka dan go boazoealáhus ii leat bovdejuvvon bargojovkui.
2014:s sirdde boazodoallohálddašeami Stáhtahálddašeaddjái, ja 2019: de NIBIO evaluerii boazohálddahusa nuppástuhttima. Dál, go lea golihan moadde jagi dan rájes go nuppástuhttin geavai, de oaivvilda Eanandoallodirektoráhtta ahte lea dárbu dárkilit geahčadit NIBIO raportta bohtosiid ja leat dan oktavuođas ásahan bargojoavkku.
Trøndelága sadjásaš stáhtahálddašeaddji, Øystein Johannessen, galgá jođihit bargojoavkku ja Trøndelága boazodoallodirektevra Siv Merethe Belbo lea mielde joavkkus.
– Lean ilus go beasan váldit badjelasan dán dehálaš barggu. Boazodoallohálddahussii ja boazodoalloealáhussii lea árbevirolaš ja ođđaáigásaš boazodoallu seamma dehálaš, ja mu mihttomearri lea velá eanet buoridit boazodoalu ja nannet luohttámuša gaskal hálddahusa ja ealáhusa, dadjá bargojoavkku jođiheaddji Øystein Johannessen preassadieđáhusastis.
Hirpmástuvvan go eai leat bovden ealáhusa bargguide
Norgga Boazosápmelaččaid Riikkasearvvi (NBR) politihkalaš jođiheaddji Inge Even Danielsen lea veaháš hirpmástuvvan go su mielas lea hui imaš go boazoealáhus ii leat bovdejuvvon mielde dan bargui.
– Mun soaittáhagas fuomášin dan barggu birra bearjadaga, ja mu mielas gal lea njulgestaga ártet go eai leat bovden boazoealáhusa mielde. Boazoealáhusas han lea gealbu ja máhttu muitalit mo vásihit gulahallama ja ovttasbarggu hálddahusain, lohká Inge Even Danielsen.
Muittuha su boares sámifálddi
Inge Even Danielsen moaitá sakka dan go boazoealáhus ii leat bovdejuvvon bargojovkui.
– Mu mielas orru leamen nu ahte stáhtahálddašeaddji váillaha máhtu ja áddejumi iežas bargguide. Sii fertejit šaddat čeahpibun diehtit iežaset rolla. Dál orru mannamin boasttu guvlui, ja dál muittuha stáhtahálddašeaddji mu boares sámefálddi birra, dadjá Inge Even Danielsen.
Son deattuha ahte lea dárbu geahčadit boazodoallohálddašeami, muhto seammás deattuha ahte boazoealáhus galggašii mielde dan barggus.
Dárbu dárkkistit gulahallama ja ovttasbarggu
Eanandoallodirektoráhtta čállá preassadieđáhusas ahte lea maid dárbu dárkkistit man láhkai gulahallan ja ovttasdoaibman lea doaibman boazodoallohálddahusa siskkobealde ja boazodoallohálddahusa ja boazoealáhusa gaskka. Bargojoavku lea ožžon áigemeari geassái (2022 ) čađahit barggu ja vuosttaš čoahkkin galgá čađahuvvot dán mánus (čakčamánus).
Ferte geavvan boasttuvuohta
Sámedikki ráđđelahttu Silje Karine Muotka iige loga gullan maidige dan bargojoavkku birra.
– Ferte leat geavvan boasttuvuohta go boazoealáhus ii leat bovdejuvvon. Lea áibbas lunddolaš ahte boazoealáhus lea mielde dakkár bargojoavkkus, lohká Muotka.