– Mun lean beahtahallan
Bargiidbellodaga presideantaevttohas Ronny Wilhelmsen ferte mieđihit iežaset dahkan duođaid heajos válggaid. – Mun lean beahtahallan, muhto in mun geassát, lohká Wilhelmsen.
Bargiidbellodagas leat Sámedikkis guokte áirasa unnit go mannan válggain.
– Ledjen dan jáhkus ahte lea riekta ovddidit Bargiidbellodaga politihka, iige heajudahttit earáid politihka. Jáhkken duođasge dan. Lea áibbas čielggas ahte Nordkalottfolket, mii leamaš hui garas čájehit maid eai doarjjo ovdamearkka dihte NSR:S, vuittii dáinna. Mii fertet dál árvvoštallat movt mii galgat ovddasguvlui.
Doarjja unnu jagis jahkái
2005:s go Egil Olli lei njunnošis de Bargiidbellodagas lei eanetlohku. Dan rájes lea áirraslohku njiedjan jagis jahkái. 2009 válggain besse sisa 14 áirasiin. 2013:s 10 áirasiin. 2017:s 9 ovcci áirasiin. Gosa Bargiidbellodat massá jienaid ii loga Wilhelmsen vel áibbas čielggasin.
– Mii fertet eambbo čujuhit riidduide NSR:IN. Fertet njulgestaga bajidit jiena go eat leat ovttaoaivilis. Mii fertet njulgestaga unnit ovddasvástádusa váldit opposišuvnnas.
Ii geassát
2016 lea jahki go Bargiidbellodat ovddidii eahpeluohttámuša sámediggeráđđái. Dalle lávkii Bb Vibeke Larsen presideantan. Bargiidbellodagas siskkáldasat reagerejedje máŋggas. Dalle Bb Helga Pedersen geassádii presideantaevttohassan go ii dáhtton doarjut eahpeluohttámuša. Wilhelmsen ii jáhke dan čuohcan dáid válggaide.
– In jáhke go mii leat čájehan ahte mii leat čohkken joavkku ja ahte mis lea ollislaš ja oktasaš politihkka. Mun oaivvildan ain ahte mis leat máŋga buori ášši.
– Leat go árvvoštallan geassádit?
– Dan in leat árvvoštallan. Mis lea organisašuvdna ja dat dat mearrida gii galgá presideantaevttohassan, loahpaha Wilhelmsen.