– Mearraluossabivdit fertejit leat mielde
Sámediggi bivdá Dálkkádatja birasdepartemeantta atnit ruoššaluosa laskama duođalažžan.
– Deháleamos lea čohkkegoahtit joavkkuid mat sáhttet veahkkálagaid bivdit eret ruoššaluosaid ja jođánit ráhkadišgoahtit plánaid eastadit viidáset leavvama. Mearrasámi birrasiin lea dasa gelbbolašvuohta, dadjá sámediggeráđđi Silje Karine Muotka (NSR) preassadieđáhusas.
Ollugat leat fuolastuvvan go ruoššaluossa sakka lassána Finnmárkku jogain. Sámediggi ballá ahte dat amas guollešládja sáhttá jávkadit árbevirolaš luossašnáliid ja bilidit ekovuogádaga balánssa. Jos
Atlántaábi luossanálli vátnu, de árbevirolaš bivdokultuvra jávkagoahtá sihke vuotnaguovlluin ja jogain, dadjá sámediggeráđđi.
– Mun lean nu rámis ja duhtavaš bargguin maid ollugat leat eaktodáhtolaččat bargan mannan geasi. Sii leat bivdán ja áŋgirit geahččalan gurret ruoššaluosaid jogain, ja leat maid viggan hehttet daid gođđama jogain, muhto ruđalaš doarjja sidjiide gal lea menddo unnán, dadjá Muotka.
Leat biddjon 15 miljovnna ruvnnu govddodangilláriidda mat leat biddjon Finnmárkku jogaide jávkadan dihtii ruoššaluosa. Dálkkádat- ja birasministara Sveinung Rotevatna (G) plánain eai leat biddjon doaimmat mo ruoššaluosa sáhttá mearas bivdit eret. Dálkkádatja birasdepartemeantta mihttun ferte leat ahte buohkat veahkkálagaid jávkadit ruoššaluosa. Dá lea bargu mainna lea hoahppu ja buot resurssat fertejit geavahuvvot, ovdal go ruoššaluossa fas vuodjagoahtá jogaide 2023:s.
– Sihke báikkálaš ássit, vuotnabivdit, johkabivdit ja Sámediggi fertejit fárrolagaid hábmet ođđa strategiija, ja lea moaitinveara go buohkat eai beasa dasa oassálastit. Mii fertet jođánit ovttasráđiid ráhkadit plánaid ja mearrasámi birrasat leat dehálaččat dan barggus, dadjá Muotka.