Almmuhedje girjji válggaid birra
Dutkamis ožžo bohtosiid maid eai lean jurddašan ge.
Dutkit leat čállán girjji sámediggeválggaid birra. Girjjis Sámediggeválga: Gullevašvuohta, oassálastin ja bellodatpolitihkka leat dutkit geahččalan vástidit gažaldagaid mat gusket válggaide, nu go maid jienasteaddjit oaivvildit dan birra geat galggaše sáhttit jienastit sámediggeválggain ja mii bellodagai lea erohus mat servet sámediggeválggaide.
UIT Norgga árktalaš universitehtas lei odne girjealmmuheapmi mas dutkit Mikkel Berg-nordlie, Torunn Pettersen ja Jo Saglie ledje mielde. Mikkel Berg-nordlie muitala ahte barggádettiin dutkamiin, gávnnahedje ođđa beliid maid eai lean jurddašan ovdagihtii.
– Mii leimmet ovdagihtii ráhkadan kategoriijaid maidda jurddašeimmet gávdnojit olbmot geaid vurddiimet gávdnat. Ovdamearkka dihte ledje mis sii geat áigo leat doppe, muhto eai sáhttán. Sii geat sáhttet, muhto eai lean. Muhto lei okta kategoriija mii mis ii lean, ja dat guoská sidjiide geain lea eahpesihkkaris stáhtus jienastuslogus. Dat sáhttet leat sii geat eai diehtán leat go sii čálihuvvon dohko. Eai soaitte muitit leat go čálihuvvon dohko. Dahje sii geat doivot ahte earát ledje čálihan sin dohko, juoga mii ii leat vejolaš. Okta maid doaivvui ahte lea dieđihuvvon jienastuslohkui go dieđiha iežas NSR:I, muitala Berg-nordlie.
Eai oainne erohusa loguin
Sii álggahedje barggu ovdal 2017-válggaid. Dutki ja barggu jođiheaddji, Jo Saglie, namuha maid ovtta beali man imaštedje.
– Mii leat guhká bargan dainna, ja dan áigodagas leat oallugat čálihuvvon jienastuslohkui. Dan galggašii doaivut ahte go nu oallugat bohtet, de oaidná maid dan loguin. Muhto dan ii daga nu ollu go galggašii, ollu lea nu go lea leamašan ovdal. Jienasteddjiid oaidnu áššiin, ja nie ain, dadjá Saglie.
Son maid lasiha ahte sii geat dieđihit, eai soaitte leat nu earáláganat go sii geat ovdalaččas leat leamaš logus.
Berg-nordlie lohká dutkiid jurddašan ahte oainnut jienastuslogus gal rivdet go leat boahtán ollu ođđa jienasteaddjit, muhto obbalaččat leat oainnut nu go ovdal.
Nuvttá
Girji lea almmuhuvvon neahtas, ja lea nuvttá buohkaide lohkat.
– Girji lea buohkaide geain lea beroštupmi sámediggeválggaide, sihke obbalaš beroštupmi ja sidjiide geain sámi beallái lea beroštupmi, dieđiha Berg-nordlie.