– Gii diehtá gii «borrá» gean, ja lea miellagiddevaš oaidnit
Nuortaguovllu válgabiirres, Elisabeth Erke, lea hui ilus go oinnii bohtosiid.
– Lea gelddolaš oaidnit lea ahte Guovddášbellodat lea mannan ovddos buot gielddain ja dat várra veahkeha mu, seammás go Bargiidbellodat lea mannan maŋos, logai Elisabeth Erke Čáhcesullos Guovddášbellodaga válgagohcimis go dat vuosttaš prognosat almmuhuvvoje.
– Movt jurddašat daid vuosttaš bohtosiid birra?
– Gii diehtá gii «borrá» gean, ja šaddá miellagiddevaš oaidnit. Jus mis lassána okta áirras, de ferten dadjat ahte Guovddášbellodagas dovdo ahte leat njeallje jagi leamaš Sámedikkis, seammás leat mis unnán resurssat ja ain olu oahppat doppe. Guovddášbellodat stuorru ja boahtá lagabui olbmuid, lohká Erke.
– Manne jáhkát dis dakkár buriid bohtosiid ovdagihtii jienain?
– Mii leat garrasit bargan. Ferten dadjat ahte dán válgga, min válgabiirres leamaš buorit evttohasat, listu buorre ja buot lea bures organiserejuvvon. Áššiid ektui ferten dadjat ahte leat ollu seamma áššit go eará bellodagain. In sáhte dadjat ahte lea earenoamáš ášši mii lea čielggas dušše mis. Giella lea dehálaš midjiide, ja Guovddášbellodagas leat olu vuoruhan giellaloktema ja kultuvrra.
– Sávan ahte beasan sisa go mis lea stuora bargu dás ovddosguvlui. Balan ahte šaddet beare olu almmáiolbmot Sámedikkis. Livččen gearggus váldit saji, ja lea hirbmat gelddolaš oaidnit gii dat goalmmát áirras Guovddášbellodagas lea, lohká Erke.
Vaikko Guovddášbellodagas eai leat ollesáigge politihkkarat, de leat sii bures lihkostuvvan válggain.
Ja Erke lea hui duhtavaš.
– Mis lei válgagohcin ja čuovuimet maid stuoradiggeválgga. Leat hui duhtavaččat go Guovddášbellodagas lea stuorámus ovdáneapmi dál, lohká Erke Ávvirii.
Guovddášbellodat beassa ge golmmain áirasiin Sámediggái.