– Doar filmma

Norgga filbmainstituhtta lea addán mánusdoarjaga guovtti sámi filbmadahkkái. Sámi filbmainstituhtta sávvá buoret boahtteáiggi sámi filmmaide.

NFI, Norgga Filbmainstituhtta, lea dorjon logi guhkesfilbmamánusčálli ovddidit iežaset čállosa 250 000 ruvnnuin guđege. Guovttis dan logi olbmos leaba sámi nieiddat, Marja Bål Nango ja Lisa Marie Kristensen. Bål Nango mánusa namma lea «Guođoheaddji», Kristensena fas «Girls».

Marja Bål Nango muitala ahte su ja oappás, Ingir Bål Nango, mánusii leat buorit vejolašvuođat das go dál lea nuppes go mánusčállimii oažžuba doarjaga.

– Go addet doarjaga čállimii, de mearkkaša ahte lea hui buorre signála filmma bargui viidáseappot, ovdamearkka dihte buvttadeapmái, lohká Marja Bål Nango.

Alla dássi

Bål Nango dovdá iežas giitevažžan ja muđui lea ge maiddái ožžon doarjaga Sámi filbmainstituhtas.

– Dat čájeha ahte mis lea allá dássi, mii leat buori muddui ollen, ja ahte sis lea buorre jáhkku midjiide.

Muđui lea son maid earret eará mielde NFI ovdánahttinprográmmas UP:S. Bål Nango mielas addet dakkár doarjagat ja doaimmat buriid signálaid sámi filmmaide.

– Dieđusge lea dehálaš ahte NFI doarju eará muitalusaid maiddái, erenoamážit sámi muitalusaid.

Marja Bål Nango ja Ingir Bål Nango mánus lea nuorra 20-jahkásaš sámi badjebártni birra. Filmmas čuovvut bártni eallima go son fuobmá ja dutká iežas seksualitehta, ja go ráhkasnuvvá eará bárdnái.

– Mun dieđusge sávan ahte mii oažžut doarjaga filmma buvttadeapmái maid, dan filmma dahkamii, dál maŋŋel go lea geargan čállosiin.