Jjaoažžun lea buorre signála a bargui viidáseappot
Illu ja ballu
Nubbi gii oaččui mánusdoarjaga, Lisa Kristensen, dovdá sihke ilu ja veahá balu.
– In lean vuordán oažžut doarjaga. Lea somá ja issoras. Ipmirdan dál man olu bargu dat lea, muitala Lisa Kristensen, gii vuosttaš geardde lea čállime iežas mánusa.
Dárbbašuvvojit čeahpes čállit oažžut doarjaga
NFI ossodatdirektevra Anders Tangen muitala ahte mánusčállindoarjagii dárbbašuvvo čeahpes čálli.
– Vuosttažettiin de dieđusge fertet čállit buori čállosa. Juoga mii áŋgiruššá ja mii duođas lea buorre, lohká ossodatdirektevra Tangen.
Tangen muitala viidáseappot ahte sis lea dál fokus máŋggabealatvuhtii, ja dan dihte lea duhtavaš go ledje guokte sámi perspektiivvalaš mánusa mat ožžo doarjaga.
– Gilvu lea stuoris eaige leat nu olusat geat ožžot dakkár doarjaga.
12 jagi áigi maŋemus guhkesfilbma ráhkaduvvui
Sámi guhkesfilmmat eai gávdno nu olu, ja maŋemus guhkesfilbma Norgga bealde ráhkaduvvui badjelaš 10 jagi áigi, muitala ISFI, Internašunála Sámi Filbmainstituhta direktevra Anne Lajla Utsi Ávvirii.
– Guokte guhkesfilmma leat dál ráhkaduvvome, muhto dan ovdal lei «Guovdageainnu Stuimmit» maŋemus guhkesfilbma Norggas.
Dainna ii leat ISFI nu duhtavaš ja mihttun livččii ge ahte juohke jagi ráhkaduvvošii guhkesfilbma.
– Mii leat ovdal gažadan sis manne muhtin buorit sámi filmmat, mat min mielas leat buorit, eai oaččo doarjaga.
Utsi namuha NFI máŋggabealátvuođafokusa ja sin gulahallama singuin, ja sávvá ahte sámi guhkesfilmmain lea rievdadeapmi boahtime.
– Muđui lea dieđusge buorre go dorjot ja oidnet min čehpiid Sámis, muhto mii leat maid Sámi filbmainstituhta bealis bargame dan ala ahte mis galgá min iežamet ruhta mainna mii beassat defineret makkár filmmaid mii háliidit ráhkadit, lohká ISFI direktevra Anne Lajla Utsi.
Eai leat logut, muhto áigot bargagoahtit eambbo
NFI ossodatdirektevra Anders Tangen muitala ahte sin bealis eai leat ráhkaduvvon logut main oaidná man olu sámi filbmabargit leat ožžon doarjagiid maŋemus jagiid.
– Muhto mii áigut dahkat dainna juoidá. Lean dušše leamaš dán barggus mánu dál, muhto mu fokus lea juste diekkár bargguid dahkat, lohká Tangen ja joatká:
– Mun sáhtán lohkat ahte mis galgá erenoamáš fokus leahkit sámi birrasii. Mus lea alddán maid veahá máhttu das go lean ovttas Nils Utsiin filmma ráhkadan Buolbmágis.
– Lea beare áigá go maŋemus filbma ráhkaduvvui
Ossodatdirektevra Tangen gaskkusta dehálašvuođa sin ođđa máŋggabealátvuođafokusiin sámi guhkesfilmmaid váilevašvuođa dihte.
– Mis lea garra fokus dasa. Mii háliidit ahte ráhkaduvvojit eambbo sámi guhkesfilmmat. Maŋemus jagiid leat mii addán eambbo doarjaga sámi filbmabargiide, go ovdal leat dahkan. Mii sávvat ahte šaddá buvttadeapmi maiddái dáin mánusiin, lohká NFI ossodatdirektevra Anders Tangen.