Isket ja gažadit veahkaválddálašvuođa sámi servodagas
Veahkaválddálašvuohta lea duođalaš servvodathástalus, maiddái sámi servvodagain. Dan oktavuođas lágida Norgga olmmošvuoigatvuohta-ásahus (NIM) seminára.
SAMINOR II iskkadeapmi čájeha ahte oallut sámi nissonat vásihit veahkaválddálašvuođa. Ođđa dutkan čájeha maid ahte sámi nissonat dávjjibut vásihit veahkaválddálašvuođa beallelaččas go eará nissonat. Ráđđehus almmuhii gieskat doaibmaplána eastadit veahkaválddálašvuođa lagas birrasiin, Veahkaválddehisvuođa čađaheapmi. Doaibmaplánas leat máŋggat doaibmabijut eastadit ja bissehit veahkaválddálašvuođa sámi servvodagas ja plána lea ráhkaduvvon ovttasráđiid Sámedikkiin.
Movt sáhttit buorebut eastadit ja bissehit veahkaválddálašvuođa lagas birrasiin sámi servvodagain? Maid mii diehtit das man olu dat dáhpáhuvvá ja manne dat dáhpáhuvvá? Ja mii lea boahtte lávki dán doaibmaplánas? Eai gávdno oanehis ja álkes vástádusat daidda jearaldagaide. Danne čohkkii Norgga olmmošvuoigatvuohta-ásahus (NIM) guovddáš aktevrraid ja berošteddjiid digaštallat dán fáttá ja dan gažaldagaid seminárii mii lágiduvvui Diehtosiiddas ikte.