Ruhtadit beatnatskálžobivddu
Sámediggeráđđi juolluda Davvenjárgga fitnodahkii Sarnespollen Havn AS:I 323 000 ruvnno prošektii mas galget beatnatskálžobivddu geahččalit.
Beatnatskálžu lea nálli man leat sámi guovlluin unnán bivdán, muhto mii jearahuvvo olu Ásia márkaniin, erenoamážit Lulli-koreas, ja sii sisafievrridit gálvvu erenoamážit Englánddas ja Fránskkas.
Sarnespollen Havn AS háliida geahččalanbivdduin duođaštit ahte beatnatskálžžu bivdin sin guovllus lea sihke gánnáhahtti ja guoddevaččat vejolaš. Sávaldat lea ahte dat šattašii lassiealáhussan mii sihkkarastá dienasvuođu ja mii geasuhivččii eanet nuoraid guovllus bivdigoahtit. Dat maid váikkuha dasa ahte ávkkástallat áhperesurssas mii dán rádjái ii leat geavahuvvon. Prošeavtta olis ovttasbargá Sarnespollen Havn AS Áhpedutkaninstituhtain.
– Midjiide lea gelddolaš oaidnit prošeavtta bohtosiid, ja sávvat beatnatskálžobivdu šaddá ođđa boahtteáigásaš, gánnáhahtti ja ceavzilis ealáhus guolásteddjiide Sed-guovllus, lohka sámediggeráđđi Silje Karine Muotka (NSR) preassadieđáhusastis.