Nancy Porsanger Anti lea rievttes olmmoš stáhtačálli ámmáhii
Mannan duorastaga diibmu 12:00 almmuhii ođđa stáhtaministtar Jonas Gahr Støre iežas ođđa ráđđehusa. Sápmelaččaide láve erenoamáš miellagiddevaš diehtit gii šaddá sámi áššiid stáhtačállin, Gieldadepartemeanttas. Dán jagi leat beaggán máŋga nama dán ámmáha oktavuođas, earret eará Bargiidbellodaga Johan Vasara ja Guovddášbellodaga Nancy Porsanger Anti. Dan ámmáha oaččui sirbmálaš Nancy Porsanger Anti.
Na gii dasto lea Nancy Porsanger Anti? Son lea ge bearašolmmoš, náitalan Nils Mathis P. Antiin ja sudnos leat golbma máná ja sii doaimmahit boazodoalu Čorgašis, Nuorta-finnmárkkus. Vuosttaš jurdda mii boahtá jurdagii lea dat ahte son lea boazosápmelaš geas lea ollu máhttu árbevirolaš boazodoalu birra, ja lea ge maiddái áŋgiris bealušteaddji boazodoalu guoski áššiin. Dan dáidet maiddái boazodoalloeiseválddit muosahan, ahte Porsanger Anti ii divtte ráfis eiseválddiid jus eai doaimmat albma láhkai iežaset bargguid. Porsanger Anti lea maiddái ámmátdulka ja lea ge dávjá dikkiin dulkome diggeáššiid. Muđui lea sus guovddášrolla Guovddášbellodagas, go lea Guovddášbellodaga sámepolitihkalašráđi čálli.
Son lea dál virgáduvvon sámeáššiid stáhtačállin, ja das ii gávdno eahpádus ahte lea rievttes olmmoš rievttes ámmáhis.
Son lea dál virgáduvvon sámeáššiid stáhtačállin, ja das ii gávdno eahpádus ahte lea rievttes olmmoš rievttes ámmáhis. Mis leat dieđus vuordámušat ahte Porsanger Anti lea ollu eambbo oidnosis maiddái mediain, go sámeservodat dárbbaša sámi jiena mii gullo ráđđehusa bealde. Danne sávvat ođđa ráđđehus ii joatkke dainna dábiin maid Solberg-ráđđehus lea álggahan maŋemuš áigodagas, ahte sámeáššiid stáhtačálli ii oidno ii ge gullo. Dađi bahábut lea leamaš dan láhkai Solberg-ráđđehusa áigodagain, ahte sámeáššiid stáhtačálli lea hirbmat jávkosis sámi guoski áššiin.
Danne vuordit ge ahte Nancy Porsanger Anti lea seamma oidnosis go ovdamearkka dihte ovddeš stáhtačállit Ellen Inga O. Haetta (Olgeš), Berit Oskal Eira rohkki (Bargiidbellodat), Raimo Valle (Bargiidbellodat), Ánte Bals (Olgeš) ja Anders JH Eira (Olgeš). Ii dieđusge Nancy Porsanger Anti bellodatustit Johanne Sommersaeter (ovdal Gaup) gii lei sámeáššiid stáhtačálli 1997-2000 áigodagas.
Vaikke Nancy Porsanger Anti lea nammaduvvon Gielda- ja guovloministtara olgešgiehtan, de jáhkkit eará ge ministariid sáhttit sus jearrat neavvagiid sámi guoski áššiide go sus lea stuora ja govda máhttu dan ektui. Danne duostat ge čuoččuhit ahte ođđa ráđđehus lea ožžon erenoamáš čeahpes stáhtačálli iežaset searvái, maid sávvamis ávkkástallet go galget sámi guoski áššiid meannudit Stuoradikkis boahttevaš njeallje jagi.