– Mii leat dego vuordináiggis dál
dávdda dáfus
– Mii leat dál dego dakkár vuordináiggis. Jus dávda leavvá, de dat sáhttá addit stuora váikkuhusaid maid dál eat vuos dieđe, dadjá gielddadirektevra Kurt Maurstad.
Kárášjogas ledje maŋŋebárgga oktiibuot 8 ođđa Covid-19 njoammuma.
Buohkat geaidda dávda lea njommon leat ollásit boahkuhuvvon ja gielddadirektevra Kurt Maurstad muitala ahte dan viđa olbmos lea gehppes nuorvu.
– Mis lea dien muddui kontrolla ahte mis lea oalle buorre oppalašgovva dilis dál. Mu duohkái goit ii leat boahtán makkárge diehtu ahte ii leat kontrolla dán dilis, dadjá Maurstad.
Eai dieđe gos lea njommon
Maurstad ii loga njoammunguorahallama čájehan vuos sihkkarit gos dávda lea boahtán ja lohká gieldda ain bargame njoammunguorramiin. Son muitala iežas maid leamaš iskosa váldime sotnabeaivve.
– Sotnabeaivve leat olusat leamaš iskosiid váldime rájá iskkusstašuvnnas. Go mun ledjen beaivet, de ledje juo badjel vihttalogis leamaš iskosa váldime. Ledje jámma olbmot doppe miehtá beaivvi, dadjá Maurstad.
– Ássit eai leat viimmáskan
Suohkandirektevra lohká vuordimis leamaš ahte dávda boahtá Kárášjohkii maid dal go servvodat lea fas rahppon. Son rámida gieldda ássiid aŋkke leamaš čeahpit čuovvut njoammueastadanbijuid vaikko ráđđehus heaittihii daid stuorámus doaibmabijuid.
– Kárášjoga gieldda ássit eai leat viimmáskan ja girdilan juohke guvlui. Sii leat ain čeahpit doallat mehtera gaskka ja gieđaid bassat. Sii orrot hui čeahpit čuovvut daid njuolggadusaid ja ávžžuhusaid mat leat leamaš. Lea dieđusge aŋkke smávva ballu ahte dávda sáhttá leavvat go eat dieđe vuos nu ollu. Muhto go ii leat gullon ahte dávda lea njommon eambbosiidda maŋŋel go nu oallugat leat iskosiid váldán vahkkoloahpas, de lea dieđusge dat maid buorre, dadjá Maurstad.
Doalut sáhttet váikkuhit leavvamii
Son muitala ahte dat viđas geaidda mannan vahkku lea njommon virus d leat sihke nuorra ja boarráset olbmot.
– Ii oro seamma guovllus boahtán dat njoammun, muhto dan leat dál iskame ja guorahallame. Mii eat dieđe vuos movt mannan vahkku ja vahkkoloahpa deaivvadeamit olbmuid gaskkas váikkuhit njoammumii. Dan eat soaitte oaidnit ovdal go gaskavahkku dahje duorastaga rájes. Gielddas leat lágiduvvon doalut mannan vahkku, muhto eat mii dieđe leat go dat váikkuhan njoammumii, dadjá Maurstad.
Son lohká gieldda fertet dađistaga árvvoštallat mo viidásit bargat jus dávda leavvá.
– Mii leat dál dego dakkár vuordináiggis. Eat dieđe vuos maidege. Jus dávda leavvá, de dat sáhttá addit stuora váikkuhusaid maid dál eat vuos dieđe. Ovdamearkka dihte jus min ásahusaide leavvá dávda, de fertet dađistaga smiehttat maid mii dahkat, dadjá Maurstad.
Bidjan johtui doaibmabijuid
Kárášjoga gielda dieđihii vuossárgga ahte bidjet johtui doaibmabijuid buhcciidossodagas ja fuollavisttiin covid-19 njoammuma oktavuođas.
– Galledeamit šiehtaduvvo ovdagihtii. Galledeaddjit čállet namaset galledanprotokollii. Juohke divššohasa nammii ožžot 4 guossi. Guossit galledit divššohasaid/ ássiid lanjain/ ásodagain, ii fal oktasašareálain. Gallesteddjiid geavahit njálbmesuoji, dieđiha gielda gieldda neahttasiiddus ja muittuhit vel spriittet gieđaid ovdal ja maŋŋá galledeami ja orrut ruovttus, jus leat buozas.
Ávžžuha ruovttus bissut
Maurstad ávžžuha álbmoga ain doallat daid njuolggadusaid mat ledje jođus nationála dásis.
– Lea dehálaš ahte buohkat geahččalit gaskka doallat, basset gieđaid ja ahte eai menddo sakka jođe. Livččii buorre jus olbmot bisoše ruovttus nu ollu go lea vejolaš dassái go mii diehtit eambbo njoammundili birra, loahpaha Kárášjoga suohkandirektevra Kurt Maurstad.