– Leamaš oba stuora beaivi
Go boahtte presideanta, Silje Karine Muotka, čurvii Guovddášbellodaga Hans Ole Eira ráđđelahttun, de badjánii Eiras oba sierralágan dovdu.
– Leamaš oba stuora beaivi. Mun lean leamaš oba guhká politihkas, muhto ferten dovddastit ahte lei sierralágan dovdu go de čurvii mu nama ja bivddii boahtit presideantta báldii čuoččahit. Vaikko dihten ahte čurve, de aŋkke lei sierralágan dovdu. In leat ovdal dáinnalágiin čurvojuvvon. Hui somá lei, lohká Hans Ole Eira (Guovddášbellodat) gii lohká ožžon oba olu lihkkosávaldagaid.
– Lean ožžon olu lihkkosávaldagaid. Olbmot leat sávvan lihku munnje. Leat sihke riŋgen, čállán dieđuid ja snappen. Hui buorre beaivi lea odne, lohká son.
Boahtte njeallje jagi galgá son ovttasbargat Silje Karine Muotkain, Maja Kristine Jåmain, Mikkel Eskil Mikkelsenain ja Runar Myrnes Baltoin, guhte luohpá NSR jođiheaddjin go lávke sámediggeráđđái.
Joatká ráđis
Ii leat vuosttaš geardde go son leamaš Sámediggeráđis. Mannan háve ii baicce bovdejuvvon boahtit ráđđelahttun lávddis ja almmolašvuođas. Dalle lávkii ráđđái maŋŋel go ráđđi lei doaibman guokte jagi ja almmá seremoniija haga.
– Lei buorre dovdu diehttelasat go čurvii mu presideantta lusa. Mus lea guokte jagi vásáhus ráđđelahttun ja dál dieđán masa manan. Nie ii lean mannan háve. Dalle lei oahppat vuos dan barggu barggadettiin.
– GB politihkka olles julggaštusas
Son ii šatta várrepresideantan nu go máŋggas leat digaštallan. Son iige vel dieđe makkár suorgái oažžu ovddasvástádusa. Dattetge lea Eira hirbmat duhtavaš.
– Min politihkka lea julggašusas čađat, álggus gitta lohppii. Nu go lean earáide lohkan, de lea nu ahte álgoálggus lea sámegiella dehálaš, ahte dat gullo, geavahuvvo ja ahte nu ollugat go vejolaš besset oahppat dan nu árrat go vejolaš ja čađat maiddái. Gielas lea buorre sadji julggaštusas. Guovddášbellodat lea maid vuođđoealáhusaid ja ealáhusaid bellodat, ja datge lea hui guovddážis julggaštusas. Boazodoallu ja dat mat gullet dan ealáhussii, nu go rievttit ja suodjalit eatnamiid leat maid guovddážis. Doppe lea olu eará maid. Dat lea nu jalla buorre dokumeanta Guovddášbellodaga polithka ektui. Oažžu juo lohkat ahte diet julggaštus lea Guovddášbellodaga politihkka.