Ávvudit 75 jagi johttičájáhusain
Dán jagi devddii Davvi-norgga johttidáiddačájáhus «Nordnorsken» 75 jagi ja dat lea galledan Davvi-norgga dán jagi ja čájáhusmátki loahpahuvvo Čáhcesullos. Čájáhusas čájehit dáidagiid maid Davvi-norgga dáiddárat leat ráhkadan dan 75 jagis.
Dalá maŋŋá go nubbi máilbmesoahti nogai 1945:s ja Norga fas lei friddja riika, de bargagohte dáiddárat. Bådådjos ásahedje Bådådjo dáiddasearvvi 1946 ja lágidišgohte «Nordnorsken» dáiddačájáhusa jahkásaččat.
– 75 ávvudeami dihtii lea jury ovttasráđiid buvttadeaddjiin bovden dáiddáriid geat barge dáiddárin 1946 rájes dálá áigái. Čájáhusas leat dáiddárat geat leat ožžon jury bálkkašumiid maŋimuš 40 jagi, muitala Čáhcesullo dáiddasearvvi gulahallanolmmoš Ingjerd Tjelle preassadieđáhusas.
Dáiddár Marit Bockelie lei dušše 11 jagi go beasai oassálastit vuosttaš Nordnorskenis. Son lei mielde Nordnorsken digitála rahpamis ođđajagemánus ja rávdnjejuvvui Facebook bokte.
Nordnorsken buvttadeaddji lea Cathrine Terese Persson, čállá Čáhcesullo dáiddasearvi preassadieđáhusas.
75-jahkásaš Davvi-norgga johttidáiddačájáhus vulggii Bådådjos ođđajagemánu 16. beaivvi 2021 ja lea galledan Spallavuoli (Svlvaer), Mussere, galleriija Davvi-norgga, Rana ja loahpas fitná velá Čáhcesullos.
Ávvučájáhusa lea vejolaš oaidnit skábmamánu 12. beaivvis gitta juovlamánu viđát beaivái Gallerikioskenis ja lágideaddji lea Čáhcesullo dáiddasearvi.