Åarjelhsaemien Teatere lea virgádan Kristin Solberg teáhterhoavdan
Åarjelhsaemien Teatere AS stivra dieđihit ahte leat ovttajienalaččat virgádan 53-jahkásaš neavttára Kristin R. Solberga ođđa teáhterhoavdan, ja son bargagoahtá cuoŋománu vuosttaš beaivvi rájes. Solberg váldá virggi badjelasas go Cecilia Persson luohpá maŋ
Åarjelhsaemien Teatere AS stivrrajođiheaddji Svein Ole Granefjell dieđiha preassadieđáhusas ahte stivra lea ovttajienalaččat virgádan neavttára Kristin Regine Solberga ođđa teáhterhoavdan. Son bargagoahtá hoavdan cuoŋománu vuosttaš beaivvi rájes, go ovddeš teáhterhoavda Cecilia Persson luohpá barggus maŋŋá guokte njealje jagi bargoáigodaga.
Máŋga logi jagi bargan sámi lávdedáidagiin
Kristin Solbergas lea bachelor árvosátni sámi gielas ja girjjálašvuođas, ja lea bargamin Indigenous Studies (eamiálbmot) masterbargguin. Son lea máŋga logi jagi bargan sámi lávdedáidagiin, kultuvrrain ja gielain. Son dovdá bures sámi teáhter ja teáhterbuvttadeami, ja lea bargoeallima bokte, sihke dáidda- ja kultursuorggis, ožžon stuorrá fierpmádaga. Son leamaš maid Sámi Lávdi, sámi lávdedáiddáriid fágalihttu, stivrrajođiheaddji ja lea ovddastan friija lávdedáiddasuorggi Davvin. Son lea maid jođihan Sámiráđi kulturlávdegotti.
– Lea hirbmat dehálaš gávdnat olbmo gii sáhtášii joatkit Cecilia Persson barggu, erenoamážit go teáhteris lea guovddáš rolla Eurohpá Kulturoaivegávpot čalmmustahttimis Bådåddjos2024. Bargu ja dábálaš teáhterdoaibma ferte fuolahuvvot seamma áiggi go dat stuorra buvttadanbargu joatkašuvvá. Cecilia Persson fuolaha Bådåddjo2024 buvttadeami go heaitá teáhterhoavdan. Dán láhkai sihkkarastet ahte sihke teáhterbargu ja Bådåddjo2024 buvttadeapmi fuolahuvvo. Leammuid Biret Rávdná, gii dál lea teáhtera buvttadanjođiheaddji, doaibmá sadjásaš teáhterhoavdan 1.1.22-31.02.22 áigodagas, muitala Åarjelhsaemien Teatere AS stivrrajođiheaddji Svein Ole Granefjell.
Bådåddjo2024
Teáhtera stivrrajođiheaddji Svein Ole Granefjell muitala ahte Åarjelhsaemien Teáhtera lea ožžon bargun buvttadit triologiija oktasaš namain «Biegke Biehteme» kulturoaivegávpotjahkái Båddåddjo2024.
– Buvttadeapmi galgá ovdanbuktojuvvot golbma iešguđetlágan teáhterbihtáid bokte, ja loahpas galgá čájehuvvot ollislaš teahterbihtán kulturoaivegávpotjagi Båddåddjo2024 rahpandoaluin, mii lea 2024 ođđajagemánus. Juohke oassi dán trilogiijas galgá čájehuvvot sierra sajiin Bådåddjo guovddážis ja geahččit galget vázzit čájáhusbáikkiid gaskka. Lea teáhterhoavda Cecilia Persson, gii dál luohpá teáhterhoavdda virggis, gii leat hutkan ja álggahan dán prošeavtta ovdanbuktima, sturrodaga ja dáiddalaš jurdaga, čilge Svein Ole Granefjell.