Sáhttá šaddat vuosttas sápmelaš Ruoŧa Riikabeaivvis
Henrik Blind (44) Johkamohkis lea Birasbellodaga riikalisttus. Sus lea vejolašvuohta válljejuvvot riikapolitihkarin Ruoŧa Riikabeaivái vuosttas sápmelažžan.
Sotnabeaivvi čakčamánu 11. beaivvi leat Ruoŧas válggat. Jienasteaddjit jienastit sihke Riikabeaivái ja gielddaide ja regiovnnaide.
Johkamohki gielddapolitihkar Henrik Blind lea guđat sajis Birasbellodaga riikalisttus. Sus lea vejolašvuohta oažžut saji Ruoŧa Riikabeaivái gos čohkkájit 349 politihkkara.
– Lea earenoamáš gudnejahtti go bellodatstivra lea válljen loktet mu nama nu bajás riikalisttus. Lea earenoamaš dovdu leat seamma listtus go ovddeš Ruoŧa kulturministarat Alice Bah Kuhnke ja Amanda Lind, ja dálá bellodatjođiheaddjit. Mearkkaša ahte bellodatstivrras lea doaivva, ja seammáa lea mus olu geatnegasvuohta go lean nu badjin listtus, čilge son.
Álgoálbmotrievttit
Henrik lea boazobargii gii lea bargan Johkamohki gielddapolitihkkarin 20 jagi. Son lea ovddidan olu sámi gažaldagaid.
– Háliidan ahte Ruoŧŧa galgá doahttalit álgoálbmotrivttid ja váldit vuhtii dálkkádatgažaldaga mii čuohcá sámi álbmogii. Ruoná nuppástus ii sáhte čuohcat sámi kultuvrii dan geail go rahpet ođđa ruvkkiid, bieggamillopárkkaid ja eará. Ii lea doallevaš politihkka jus nu barget. Lea deaŧalaš ahte olles Ruoŧŧa veahkeha. Danin lea deaŧalaš ahte sámi perspektiiva vuhtto Riikabeaivvis, dadjá Blind.
Váibmoášši
Birasbellodaga Henrik Blind čilge ahte su váibmoáššit leat biras ja dálkkadatgažaldat.
– Go orru Sámis ja árktalaš guovllus, de vuhttojit dálkkadatrievdamat. Lea lieggaseabbo, eanet dálkkit ja dat čuohcá bohccuide. Šaddet goavvejagit bohccuide. Min buolva ferte bargat buot maid mii sáhttit vai min mánáin galgá boahtteáigi dán eatnanspáppas.
Unnán doarjja
Ruoŧa Birasbellodagas leat maiddái eanemus sámit listtus, guhtta kandidáhta. Doarjja Ruoŧa Birasbellodahkii lea maŋemus jagiid njedjan. Oaiviliskkadeamit čájehit ahte Birasbellodagas lea 5,5 % doarjja Ruoŧas. Danin sáhttá šaddat váttisin Henrik Blindii olahit stuolu Riikabeaivvis dán čavčča, muhto sus lea doaivva.
– Lea váttis dadjat man stuora vejolašvuohta mus lea oažžut saji Ruoŧa Riikabeaivái. Leat jienasteaddjit geat válljejit. Mđi eanbut geat jienastit Birasbellodaga, dađi stuorit vejolašvuohta mus lea. Lea hui gelddolaš oaidnit válgabohtosiid, dadjá Henrik Blind.