Dehálaš giellavuoruheapmi go addet nuvttá mánáidgárdesajiid
Sámediggeráđđi ovdanbuvttii iežaset bušeahttaevttohusa mánnodaga, ja dan oktavuođas sii evttohit nuvttá sámi mánáidgárdesajiid maid lulábealde Davvi-romssa. Dán vuoruheapmái lea Sámediggeráđđi evttohan bidjat 3 miljovnna ruvnno. Sámediggeráđi bušeahttaovddasvástideaddji, Runar Myrnes Balto, dadjá otná Ávviris sin jáhkkit ahte dát fálaldat movttiidahttá váhnemiid válljet sámi mánáidgárdefálaldaga mánáide, ja seammás lea dát buorre sámi bearrašiid ekonomiijai.
Mii leat maŋemus áiggiid gullan ja oaidnán ollu dan birra ahte váilot sámi mánáidgárdeoahpaheaddjit. Miehtá Sámi váilot fágabargit, ja erenomážit rahčet mánáidgárddit ja skuvllat deavdit mánáidgárdeoahpaheaddje- ja oahpaheaddjevirggiid. Oažžu jearrat ahte sáhttá go son dilli šaddat vel eanet hástaleaddjin dás duohko dan dáfus, go nuvttá mánáidgárdesadji dáidá geasuhit oallugiid, ja erenoamážit sin geat leat vihkkedallan galget go bidjat máná sámegiel vai dan dárogiel mánáigárdái mii lea iežas lagasguovllus? Jus váldá Oslo ovdamearkan, de lea doppe dušše okta mánáidgárdi ja sápmelaččat orrot miehtá gávpoga. Diehttelasat dagaha nuvttá mánáidgárdefálaldat eambbo deattu suohkaniidda go sámi mánáidgárdesajit šaddet bivnnuhat. De orru vuogas jearrat ahte váikkuha go dát fálaldat dasa ahte sámi mánáidgárdesajit šaddet bivnnuhin maid sidjiide geain ii leat sámi gullevašvuohta ja giellaseailluhanberoštupmi? Dagaha go dát ođđa fálaldat ahte šaddá váttisin gávdnat saji buot mánáide geat áiggoše beaivválaččat gullat, oahppat ja stoahkat sámegillii? Eahpitkeahttá šaddet sámi mánáidgárdesajit bivnnuheabbon dás duohko, ja de lea dehálaš jearrat makkár eavttuid lea Sámediggeráđđi jurddahan sámi mánáidgárdesajiid ektui. Sáhttá jearrat maid leatgo dán vuoruheami oktavuođas suokkardallan váikkuhusaid giellageavaheapmái? Sáhttá go ovdamearkka dihte šaddat nu ahte mánáid stoahkangiella ii leat šat sámegiella jus fálaldat lea rabas juohkehažžii?
Oaivvildit ahte dát lea buorre ja dehálaš vuoruheapmi Sámediggeráđis. Jus dát fálaldat veahkeha sámegielat mánáid váhnemiid válljet sámi mánáidgárddi ovdalii eará mánáidgárddiid, de sáhttá dát váikkuhit giellaseailluheapmái ja ahte mánát geat muđui eai gula nu ollu sámegiela friddjaáiggis, eai masse gielaset.
Muhto ii dáidde áibbas endorii árvvoštallat maid bidjat eavttuid sisaváldimii.
Eahpitkeahttá šaddá sámi mánáidgárdesadji oalle bivnnuhin dás duohko