Festivála lágiduvvo fas 12 jagi maŋŋel
Sámi biebmofestivála mii ii leat 12 jahkái lágiduvvon, lágiduvvui Kárášjogas mannan vahkku.
Sámi biebmofestivála lágiduvvo maŋŋá moanat jagiid bottu. Lágideaddjit oidnet ulbmilin ahte festivála bokte árvvosmahttet árbevirolaš biebmo- ja málestanárbevieruid. Háliidit nannet sámegiela, ávkkástallat báikkálaš resurssaid sihke árbevirolaš ja ođđa vugiiguin ja fievrridit máhtu nuorat bulvii.
– Dat maid mii háliidat lea ahte mii nagodat fas boahtte jagi lágidit dán. Mun oainnán dát lea hui ávkkálaš, dan birrasis, nuoraid luhtte ja obbalohkai čalmmustahttit daid resurssaid mat mis leat, sihke borramušresurssaid ja olbmuid geat máhttet, ja oahpahit earáide, dadjá biebmofestivála dálá lágideaddji, Kárenaš giella- ja kulturguovddáža jođiheaddji, Gudrun Eriksen Lindi.
Sámi biebmofestivála lágidit ovttasbarggus SVD Musea- ja historjásearvi, Sámiid Vuorkádávvirat (SVD), Samhold Penšunistasearvi, Kárášjoga Penšunistasearvi, Sámi joatkkaskuvla Kárášjogas, Kárenaš Sámi giella- ja kulturguovddáš, Kárášjoga gielda, NKD/UKM.
Gielddas leat resurssat dasa
Festivála rahpamii maid searvvai Kárášjoga gieldda sátnejođiheaddji. Ávvir jearrá sus oaidná go son vejolažžan boahtteáiggis lágidit biebmofestivála Kárášjogas?
– Dat lea vejolaš. Mii ovttas earáiguin sáhttit ruhtadit ja ráhkadit dakkár festivála, muitala Kárášjoga sátnejođiheaddji Svein Atle Somby Ávvirii.
Sátnejođiheaddji oaidná dakkár lágideami hui dehálažžan servodahkii, ja lea dan oaivilis ahte servodat dárbbaša arenaid gos čalmmustahttet sámi biepmuid maiddái beaivválaččat ii ge festivála oktavuođas.
– Mii borrat unnit ja unnit sámi biepmuid, mii eat oainne šat daid beaivválaččat mállasiin. Mii borrat pizza ja taco, hamburgera váldit beaivválaš borramuššan. Nu ahte dakkár festivála lea issoras dehálaš doalahit, dadjá Somby.
Biebmokursa
Festiválaprográmma oassin lea earet eará biebmokursa man jođiha sámi koahkka, Máret Rávdná Buljo.
Ávvir sáhkkiivuođa dihte jearrá ge Kárášjoga sátnejođiheaddjis áigu go searvat daidda kurssaide.
– Na, mun in leat buorre koahkka. Mun máhtán veahá gal, muhto ii olu, mojiin vástida Somby.
Biebmofestivála lágiduvvo golggotmánu 28. ja 29. beaivvi
Sámi joatkkaskuvllas Kárášjogas.