Guovtti jahkái giddagassii
Rohcošeami dihte
Guđalotjahkásaš dievdu, muhtun sámi suohkanis eret, lea Hálogalándda Lágamánnerievttis dubmehallan seksuálalaččat veagalváldán vuolleahkásaš nieidda.
Dievdu šaddá giddagassii guovtti jahkái, seammás šaddá máksit 200 000 ruvdnosaš buhtadusa gillájeaddjái.
Dušše 7-8 jagi boaris
2016 loahpas ožžo politiijat dieđu vejolaš rohcošeami birra, ja álggahedje ášši.
Duomus boahtá ovdan ahte rohcošeapmi galgá dáhpáhuvvan moddii ja moatti jagi gaskka dáhpáhusain. Go dáhpáhusat leat deaividan, de lea nieiddaš oađđán go dievdu lea boahtán su lusa, eaige stobus leat leamaš eará olbmot daid áiggiid.
Duomus čállet ahte nieida lei 7-8 jagi boaris go vuosttaš geardde vásihii ahte dievdu seksuálalaččat veagalválddii su. Rohcošeapmi lea dáhpáhuvvan gillájeaddji ruovttus, gos gillájeaddjis lea riekti leat oadjebassan.
Feasttas vuolgán nieidda lusa
Vuohččan go dievdu seksuálalaččat veagalválddii nieidda, de eai lean earát stobus. Duomus boahtá ovdan ahte dievdu galgá leamaš feasttas juhkamin árabut dan eahkeda, go de bođii ruoktot, de velledii seŋgii nieidda báldii. Nieida čilgii dikkis ahte son lei balus go dáhpáhus deaividii.
Nuppes go dáhpáhuvai, de galgá dievdu vuot leamaš feasttas ja juhkan. Eai dalle ge leat earát leamaš ruovttus. Go dievdu bođii ruoktot, de vulggii nieidda latnjii. Nieida gullái go dievdu bođii seŋgii, son ballái ja muhtun láhkai beasai eret seaŋggas. Son vulggii de eret ruovttus, manai skihpáriid lusa, ja idjadii doppe.
Leaba fulkkežat
Dubmehallan dievdu hilgu dáhpáhusaid čuožžilan, iige man ge láhkai mieđa ahte dáhpáhusat leat čuohcan gillájeaddjái.
Dievdu nieiddaš leaba fulkkežat.
Hålogalándda Lágamanneriekti meannudii ášši ja duopmu lei ovttajienalaš.
Ii leat ovttaoaivilis
Dubmehallan dievddu advokáhtta, Thomas Klevenberg, muitala ahte sus eai leat olu kommentárat áššái.
– Mun in leat ovttaoaivilis duomuin, go earret eará gillájeaddji čilgejupmi gos rohcošeapmi galgá dáhpáhuvvan ii doala deaivása dainna mii lea dáhpáhuvvan, muitala Klevenberg.
Klevenberg čilge ahte su klientii lea ášši leamaš hui lossat ja čuohcan sutnje.
– Son heađástuvvá go eai jáhke sutnje. Erenomážit go leat čuoggát main leat objektiivvalaš duođaštusat osiide maid gillájeaddji lea čilgen, mat eai doala deaivása, loahpaha son.
Gillájeaddji advokáhtta, Svein Bjørnar J. Maude, ii dáhto kommenteret ášši.
Duhtavaš duomuin
Stáhtaadvokáhtta Siv Remen muitala Ávvirii ahte son lea duhtavaš duomuin.
– Lean hui duhtavaš duomuin, go jurddaša sivalašvuođagažaldaga ja ráŋggáštusmihtideami. Lágamánneriekti oaivvildii maid, nu mo Sálttu ja Lofuohta diggegoddi, ahte dievdu lea siválaš vearredaguide ja son ráŋggáštuvvo dan vuođul maid áššáskuhttineiseváldi čuoččuhii guoddaleamis.
Remen duođašta ahte dubmehallan dievdu ii leat guoddalan duomu, ja duopmu lea riektevuoimmalaš.