Dievdduid dearvvašvuohta fokusis

Dál álggii skábmamánnu ja jahkásaččat lea dievdduid dearvvašvuohta fokusis juste dán mánu. Maŋemus jagiid lea čuožžilan okta dehálaš symbola juste dán fuomášupmái, namalassii dat ahte dievdoolbmot seastigohtet sepmoniid ja skávžžáid.

Dát mearka lea ožžon namahussan «movember» ja dat lea nannosit fuomášuhttán mo dievdoolbmot váldet vára iežaset rupmašis ja mo gieđahallet čielga dávdamearkkaid. Dávjá sáhttá leat nu ahte dievdoolbmot eai iskkat manne dávdamearkkat leat boahtán ovdal go lea jo beare maŋŋit.

Vaikko sepmonat eai soaitte nu čábbát buohkaide, de soaitá dain ávki fuomášuhttit dievdoolbmuid borasdávddaid seammaládje go Rosa sløyfe-akšuvdna lea fuomášuhttán čižžeborasdávdda jo ollu jagiid. Juste dán dihte lea ge Movember foundation ásahuvvon ja ulbmil lea fuomášuhttit ovdaráksá- ja bálloborasdávdda, dearvvašvuođa ja eallinkvalitehta dihte. Miehtá máilmmi diktet dievddut sepmoniid šaddat, fuomášuhttindihte dán ášši, ja dan seammás čoggojuvvo maid ruhta ovdaráksáborasdávdda dutkamii. Ovdaráksáborasdávda lea nubbin dábáleamos borasdávda dievdoolbmuin, ja soaitá maid dat borasdávda mii lassána eanemusat. Dan birra ii ge hubmojuvvo nu ollu go galggašii. Juste dat ii soaitte nu ártet, go lea sáhka intiibma rumašosiin. Ja nu soitet ge sepmonat álkidit ja álggahit ságastallama ja buktit gažaldaga dan birra ahte leat go juste don iskkahan iežat. Dát sepmonat leat dego dievdoolbmuid Rosa sløyfe-akšuvdna.

Ja nu soitet ge sepmonat álkidit ja álggahit ságastallama ja buktit gažaldaga dan birra ahte leat go juste don iskkahan iežat.

Dál heive ge bures buohkaide seastigoahtit sepmoniid ja fuomášuhttit dán dehálaš ášši. Ja ale fal bala jearraleames iežat olbmás, áhčis, vieljas dahje earás ahte lea go son iskkahan iežas. Lea buoret iskkahit beare dávjá, go oktii beare unnán ja maŋŋit.