ÁRRAN 360° ohcá ođđa prošeavttaid Bådådjo 2024 doaluid olis
– ÁRRAN 360° ohcá dál ođđa prošeavttaid, ja mii ávžžuhit erenoamážit nuorra sámi filbmadahkkiid ja digitála dáiddáriid miehtá Sámi ovdanbuktit ođđa jurdagiid dán prošeavtta oktavuođas.
Nu čállá Internašunála Sámi Filbmainstituhta (ISFI) direktevra Anne Lajla Utsi pressadieđu bokte.
2024:s galgá ÁRRAN leat Bådåddjo 2024 – Eurohpálaš kulturoaivegávpoga oassin ja dan olis háliidit láhčit diliid suokkardeapmái ja innovašuvdnii ja ohcat ođđa prošeavttaid 360-filmmaid ja digitála dáidaga oktavuođas.
– Mii ohcat prošeaktajurdagiid filbmadahkkiin ja dáiddáriin geat háliidit suokkardit 360° -formáhta vejolašvuođaid ja geat eai bala muitaleames álgoálbmotmuitalusaid ođđa oaidninsajis, čállá ISFI direktevra, Anne Lajla Utsi.
Lea ISFI mii goziha prošeavtta. Ođđa barggut čájehuvvojit ÁRRAN filbmalávus ja šaddet Árran-prográmma oassin, ja sáhttet dan olis čalmmustahttojuvvot viidát riikkaidgaskasaččat.
– ÁRRAN 360 čájeha movt sápmelaččat oidnet gierdomannolaga, gos vássánáigi, dálááigi ja boahtteáigi deaivvadit áiggiid ja jurdagiid
Lihkostuvvan
Dán jagi borgemánus čájehuvvui ÁRRAN 360° vuosttaš geardde Venezias, oassin Veneziabiennála Sámi paviljoŋgga viiddiduvvon prográmmas. ISFI čállá ahte prográmmas čájehedje sámi filbmadahkkiid hutkkálaš ja innovatiiva fámu ja suokkardaleamis ođđamállet Xr-teknologiija ja sámi muitalusaid ovttastahttimis.
– Maŋemus jagiid leat sámi filbmadahkkit hirpmahuhttán filbmamáilmmi mihtilmas muitalusaiguin iešguđetge stuora filbmafestiválain birra máilmmi. Ealli digitálagovat leat čájehan sin erenoamáš návcca muitalit movt álgoálbmogat oidnet máilmmi ja maid ceavzilis boahtteáigi mielddisbuktá, čállá ISFI direktevra, Anne Lajla Utsi.
Ohcanáigemearri
Ohcanáigemearri sáddet sisa bargguid lea juovlamánu 15. beaivi 2022. Eanet dieđuid logat Internašunála Sámi Filbmainstituhta neahttasiiddus. Prošeavttat čájehuvvojit oassin BÅDÅDDJO 2024-prográmmas ja vuosttaščájáhus lea guovvamánus 2024.