Sámi ofelaččat johtigohtet skuvllaid mielde Troanddimis
Sámi ofelaččat leat dán skuvlajagi gergosat johtit skuvllaid mielde ja muitalit sámiid birra.
– Sámi ofelaččat leat hui bivnnuhat. Mii oaidnit ahte lea stuora beroštupmi oažžut eambbo dieđuid sámi áššiid birra, ja diibmá ofelaččat eai ollen fitnat earret go vuollel beali dain skuvllain mat diŋgojedje ofelaččaid logaldallat, go ii lean sadji áigeplánas, čállet preassadieđáhusas sámi ofelaččat.
Ofelaččat Mathis Eira (20) ja Ole-christer Haetta (19) Guovdageainnus
eret, Benedikte Eriksen (19) ja Linńea Knutsen (20) Divttasvuonas eret, illudit logaldallat ja go viimmat besset mátkkoštišgoahtit skuvllaid mielde Norggas. Sii leat dán vahku čoahkkanan Troanddimii, ja galget galledit Byåsen joatkkaskuvlla, Tiller joatkkaskuvlla ja Skansen vgs. Steinerskolen, ja Orkanger joatkkaskuvlla.
Sávvet buriid ságastallamiid ja gažaldagaid
2022 čavčča leat ofelaččat
gazzan oahpu sámi kultuvrras ja servodatoahpus ja logaldallanteknihkain Sámi allaskuvllas Guovdageainnus. Dál leat gergosat oahpahit nuoraid Norggas sámi kultuvrra ja historjjá birra, ja movt dál lea eallit nuorra sápmelažžan.
– Leat gullan ahte sáhttá leat unnán diehtu ja máhttu sápmelaččaid birra, ja diehtu soaitá leat boaresáigásaš. Mii sávvat movttiidahttit nuoraid oahppat eambbo sápmelaččaid birra, ja ahte sáhttit leat mielde eastadeame ovdagáttuid
ja stereotiippaid sápmelaččaid birra, dadjá Ole-christer Haetta (19).
Nuoras nurrii
Sámi ofelaččat mátkkoštit miehtá Norgga ja muitalit sámi kultuvrra ja servodaga birra joatkkaskuvllain ja eará skuvllain. Doaimma bokte galget Norgga nuorat beassat oahppat sámiid birra sámi nuorain. Juohke jagi válljejuvvojit njeallje sámi nuora gaskal 18 ja 25 jagi ofelažžan. Erna Solberg álggahii sámi ofelašdoaimma 2004:s go son lei
gielddaministtar. Jurdda lei ovddidit dieđuid sámiid birra, vai olbmuin lea eambbo diehtu sámi kultuvrra, servodaga ja historjjá birra, ja rievdadit guottuid ja eastadit ovdagáttuid, boasttuipmárdusaid, cielaheami ja rasismma sámiid vuostá.
Sergey Gavrilov sergey@avvir.no