Barget nannoseappot borramušbuvdasuorggi gilvodiliin
Mannan vahkus almmuhii ealáhusministtar guokte molssaevttolaš evttohusa mo caggat eahpeáššálaš haddevealaheami dakkár gálvodoaimmaheddjiin, main lea mearkkašahtti márkanfápmu. Ealáhusministtar Jan Christian Vestre háliida maid addit Gilvobearráigehččui nannoset doaibmanmuni.
– Sisaoastinhattiin lea stuorra mearkkašupmi borramušbuvdaráidduid gánneheapmái ja vejolašvuhtii gilvalit garrasit eará borramušbuvdaráidduid vuostá. Jos muhtun borramušbuvdaráiddut vuogádatlaččat ja guhkit áiggi badjel ožžot buoret eavttuid go earát, de dat bilida gilvvu ovdii.
Mii fertet fal garvit dakkár dillái gártamis, mas oastit ožžot heajut fálaldagaid ja divraset hattiid go dárbbašlaš, dadjá ealáhusministtar Jan Christian Vestre preassadieđáhusas.
Ealáhusministtar almmuhii miessemánu 10. beaivve ahte bidjet johtui njeallje doaimma, maiguin buoridit borramušbuvdasuorggi gilvodili. Okta doaimmain lea geahčadit vejolašvuođaid muddet haddevealaheami. Duogážin lea, ahte sierralágan sisaoastinhattit sáhttet dahkat váddásabbon álggahit ođđa doaimmaid borramušbuvdamárkanis, ja dat sáhttá dihto eavttuid vuođul ráddjet dálá borramušbuvdaráidduid gaskasaš gilvvu.
Guokte sierra gielddusevttohusa
– Mii oaidnit ahte dárbbašuvvojit ođđa njuolggadusat mat addet
Gilvobearráigehččui vejolašvuođa beaktilit gozihit haddevealaheami, mii vahágahttá gilvaleami. Danin evttohit dál guokte sierralágan molssaeavttu, maiguin gieldit haddevealaheami, nu mo Stuorradikki ovttajienalaččat mearridii, dadjá Vestre.
Ráđđehus sáddii golggotmánu 26. beaivvi gulaskuddamii guokte evttohusa mo gieldit haddevealaheami. Vuosttaš molssaeavttuin biehttalit dakkár gálvodoaimmaheddjiid, main lea mearkkašahtti márkanfápmu, vealaheames hattiid almma áššálaš ákkaid haga.
Nuppiin molssaeavttuin biehttalit haddevealaheami jos dat ráddje dahje addá vejolašvuođa ráddjet gilvvu. Dan evttohusa vuođul Gilvogeahčču sáhttá árvvoštallat máŋgga gálvodoaimmaheaddji (leverandevrra) šiehtadusaid oktan. Dan láhkai sáhttet gozihit njuolggadusaid beaktileappot go dálá dilis.
Mielddisbuktá dihto riskka
Eahpeáššálaš haddevealaheami gieldimis lea riskan ahte gielddus sáhttá čuohcat dakkár haddevealaheapmái mii ii vahágahte gilvvu, dahje dakkár haddevealaheapmái mii lea positiiva gilvui ja mielddisbuktá ostiide vuolit hattiid.
– Mii fertet vuđolaččat ja buriin áiggiin bargat, nu ahte láhkaásahusain eai badján čuovvumušat maid mii eat háliit, nugo ovdamearkka dihte eat háliit geahnohuhttit insentiivvaid šiehtadallat buoret eavttuid, nu ahte gálvodoaimmaheaddjit eai šat nu mielas atte hálbbiduvvon hattiid. Danin lea mávssolaš, ahte mii beassat gullat buot buriid ákkaid sihke dákkár evttohusa bealis ja vuostá, dadjá ealáhusministtar.
Nannoset doaibmaváldi Gilvobearráigehččui
Láhkaásahusevttohusaid lassin ovdanbuktui vejolašvuohta addit Gilvobearráigehččui ođđa márkandutkanreaiddu. Dakkár reaiddu dárkilet čilgehus ja muddenevttohus gieđahallojuvvojit sierra gulaskuddannotáhtas maŋŋá, muhto dan hárrái sáhttet ovddidit gaskaboddasaš oaiviliid dál jo.
– Mii háliidit addit Gilvobearráigehččui buoret reaiddu, mainna beaktileappot sáhttet caggat gilvalanhástalusaid borramušbuvdasuorggis, ja maiddái eará surggiin. Dat sáhttá maid buoridit gilvaleami, ja nu šaddá buoret gálvofálaldat buvddain ja oastit ožžot eanet gálvvu ruđa ovddas, dadjá Vestre.
Inga Marie Guttorm inga@avvir.no