Ovttajienalaš gielddastivra mearridii AHTE EAI HÁLIIT RUVKEDOAIMMA
Kárášjoga gielddastivra mearridii ovttajienalaččat ahte ii addo kanádalaš fitnodahkii EMX Norwegian Services AS minerálaohcanlohpi Ráiteváris, iige Gallujávrris Kárášjoga gielddas.
Norgga minerálahálddašandirektoráhtta (DMF) oktan Svalbárdda báktemeaštáriin juolludii kanádalaš fitnodahkii EMX Norwegian Services AS (EMX norgalaš bálvalusat) minerálaohcanlobi geassemánu goalmmát beaivvi 2021. Fitnodat háliida ohcat minerálaid Ráiteváris 1-18 Kárášjoga gielddas. DMF lea juohkán iskanvuoigatvuođaid Gállojávrri ja Ráitevári guovlluin Kárášjoga gielddas EMX Norwegian Services AS minerálaohcci iskanvejolašvuođa.
DMF lea sádden mildosiin Kárášjoga gildii ahte ohcanfitnodat oažžu iskanvuoigatvuođa Ráiteváris 1-18 ja Ráiteváris 19-24 ja Gallujávrris 1-8 Kárášjoga gielddas. Iskanvuoigatvuohta addá lobi ohcat nihkkela, platiinna, veaikki, koboltta ja golli dáid guovlluin, ja ohcanvuoigatvuohta bistá čieža jagi maid sáhttá guhkidit jus ohcá.
DMF čállá gielddas ii leat vuostálastinvuoigatvuohta, dušše váidalanvuoigatvuohta, go lea minerálaláhka mii stivre dan. DMF háliida dattege gieldda formála oaivila áššis.
Kárášjoga gielddastivra jienastii ovttajienalaččat ahte eai háliit minerálaohcamiid Kárášjoga gildii.
Ákkastallan
Kárášjoga gielddastivra čuovvolii ovttajienalaččat ovdagotti ovttajienalaš čuovvoleami biras, plána ja servodagaovdánahttin váldolávdegotti ákkastallama.
Nu Kárášjoga gieldda direktevra evttoha mearrádusa:
Kárášjoga gielda ii dohkket luonddulihkahallama iskkademiid Gállojávrris ja Ráiteváris. Gieldda mielas eai galggaše álggahuvvot doaimmat gávnnastumiid vuođul dáin guovlluin, eaige eará guovlluin gielddas. Boazodollui, geain leat siiddat seamma guovlluin, čuozašii dat hui sakka. Boazoealáhusas leat guhkes árbevierut gielddasteamet, ja lea áibbas sorjavaš dáid areálain doaimmaidasaset dihtii. Kárášjoga gielda lea hui restriktiiva luonddulihkahalla
miidda guovlluin mat leat dehálaččat boazoealáhussii. Bohkamat ja vejolaš ruvkedoaibma sáhttet maid nuoskkidit Kárášjoga ja Deanu.
Ássá Kárášjogas luonddu dihtii
Gielddastivrra meannudeamis, háliidii Kjell Olav Guttorm, SÁB áirras, sátnevuoru.
– Mun lean hui hirpmástuvvan direktoráhtii go lea juolludan fitnodahkii ohcanlobi dien guovllus. Mun balan jus gávdnet minerálaid doppe, de bohtet roggat minerálaid ja bilidit min luonddu. Ráitevárri 1-24 -guovlu lea guovlu maid mun dovddan bures. Mun lean oahppan mu áhčis, ádjás ja áhči vieljain ja oappáin geavahit dieid guovlluid. Ovdamearkka dihte bivdit mii ealggaid dien guovllus. Mun lean lubmen ja oggon go lei lohpi oaggut. Muđui geavahit mii dán guovllu meahcásteapmái, muitala Kjell Olav Guttorm gean máttut leat ássan Gorvvás Kárášjoga siste birra jagi.
Kjell Olav Guttorm lohká son háliidii namuhit dáloniid meahcásteami guovllus go evttohusas namuhuvvui dušše boazodoallu.
Lohká sutnje lea dán guovllu luondu hirbmat dehálaš ja leage ágga manin son ássá Kárášjogas.
– Jáhkán olusat dahket dan. Lea áddetmeahttun ahte ožžot lobi deike boahtit minerálaid ohcat ja gielda ii sáhte measta maidege dahkat. Nubbi lea, na maid jus de gávdnet, maid dalle, lohká nuorra gielddastivraáirras, Kjell Olav Guttorm.
Dán guovllus leat ovdal eará ruvkefitnodagat ohcan minerálaid. Guttorm muitala ohcanbáikkiin leat báhcán dievva moadde goartil guhkkosaš ruovdečuolddat áibmui geaigát sorbmin olbmuide ja elliide.
Váidalanvejolašvuohta
Norgga minerálahálddašandirektoráhtta (DMF) oktan Svalbárdda báktemeaštáriin čállá gielddas ii leat vuostálastinvuoigatvuohta, dušše váidalanvuoigatvuohta, go lea minerálaláhka mii stivre dan. DMF háliida dattege gieldda formála oaivila dán áššis.
Kárášjoga listtu áirras, Jovna Ailo Anti háliidii diehtit leago Kárášjogas váidalanvuoigatvuohta.
Kárášjoga sátnejođiheaddji Svein Atle Somby vástidii dalán ahte Kárášjogas lea váidalan
vuoigatvuohta go gielda mearrida ieš maid gielda háliida.
Ruvkedoaibma vahágin sámi kultuvrii
Kárášjoga gielda árvvoštallá dákkár sisabahkkemat leat boazodollui stuorra vahágiin, ii dušše ieš iskan, muhto maid jus roggagohtet dáid minerálaid. Kárášjoga gielda lea mearridan go barge
servodaga gielddaplána arealstrategiijaplánain, mii mearriduvvo juovlamánus, ahte: Mii leat gáhtten ja geavahan iežamet eatnamiid, luonddu ja birrasa ovddidit sámi kultuvrra, ealáhusa ja servodateallima.