Čogget ruđa «Daednugádde Nuorat» Cdskearru deaddileapmái
«Daednugádde nuorat» lea Deatnogátte nuorat joavkku Lp-skearru mii almmuhuvvui jagis 1974. Falck lágádusas háliidit deaddilit Lp-skearru Cd-skearrun. Cd-skearru galgá šaddat oassin Norgga álbumklassihkkariid Cd-ráiddus. Ulbmil dainna almmuhemiin lea almmuhit musihka mii ii leat ovdal almmuhuvvon Cd-hámis dahje man lea váttis gávdnat oastit.
– Mii háliidit oažžut dan oassin ráiddus dan dihte go dat lea Norgga álbumklassihkar, čállá Falck-lágádusa Christer Falck e-boastta bokte.
– Dat leat nu olu buorit sámi musihkat maid háliidit dan ráidui, nu ahte dát lea dušše álgu, joatká Falck.
Golggotmánu 20. beaivvi dán jagi álggahii Falck lágádus ruhtačoaggima mii loahpahuvvo skábmamánu 19. beaivvi. Dan áigodagas áiggoše čoaggit 30 000 ruvnno Daednugádde nuorat Cd-skearru deaddileapmái, mas galget leat 17 lávlaga.
Buoret go originála
«Deatnogátte nuorat» joavku lea almmuhan golbma Lp-skearru 1974 ja 1979 gaskkas. Namalassii «Daednugádde Nuorat» (1974), «Daednugáddis» (1976) ja «Nuorat 3» (1979). Sin namas lea maid ilbman «Buoremusat» Cd–skearru jagis 2001. Falck lágádusas dovdet daid visot.
– Mii háliidit juste dán min ráidui, dan dihte go «Buoremusat» Cd-skearru lea čoakkáldat mas leat muhtin ođđa lávlagat, ja lea áibbas eará go originála skearru, čállá Falck e-boastta bokte.
Falck joatká ja muitala ahte olbmuin berreše leat goappašat dat.
– Originála skearru mii almmuhuvvui MAI skearrofitnodaga bokte 1974:s lea dehálaš oassi Norgga musihkas, oaivvilda Falck.
Lágádusas muitalit ahte iešalddis Norgga albumklasihkkárráiddun lea ulbmil almmuhit musihka ođđasis nu go lei álgoveršuvnnas. Lágádus lohká ođđajagimánu 2021 rájes almmuhan 400 skearru ruhtačoaggima vehkiin.
– Skearru oažžu ođđa jiena, nu ahte dat šaddá buoret go goassige ovdal, deattuha Christer Falck.
Lobálaččat
MAI skearrofitnodat, man bokte Deatnogátte nuorat-joavkku vuosttaš Lp-skearru almmuhuvvui, ii leat leamašan doaimmas 1983 rájes. Dasto manne vuoigatvuođat «Nye Samspill» searvái, seammás go dat fálai artisttaide oastit iežaset háldui buvttadanrivttiid. Muhtimat leat dahkan dan. 2001:s vuvddii «Nye Samspill» searvi visot buvttadanrivttiid stuorra Universal Music skearrofitnodahkii.
– Dat lea Universal masa skearru rievttit gullet. Mii leat jearran sis ja ožžon lobi, čilge Christer Falck Ávvirii.
Son joatká:
– Mii ges fállat buriid eavttuid artisttaide ja «masteringa» eaiggádiidda.
Falck muitala ahte Universal Music lea oastán 90 proseantta buvttaduvvon musihkas ovddeš MAI skearrofitnodagas. Universal skearrofitnodat mearrida ieš addá go liseanssa olggobealbeliide vai ii.
– Dat lea myhta
Ávvira journalista jearrá Christer Falckas lea go nu ahte Lp-skearru jietna lea buoret go Cd–skearru?
– Dat lea myhta ahte Lp-skearrus lea buoret jietna go CDskearrus. Jietnačeahpit leat ovttaoaivilis das ahte CD lea buoret čuojahanformáhta go LP, čilge Falck.
– Olbmos galggaše leat hui buorit čuojanasat ja rusttegat vai
Lp-skearru jietnačuodjan šattašii seamma buorre go Cd–skearru jietnačuodjamis, oaivvilda Christer Falck.
Cd-berošteddjiide
Son muitala ahte «Daednugádde nuorat»-álbuma gávdno jo musihkkarávdnjenbálvalusain. Lp-skearru lea váttis gávdnat, muhto lea vejolaš dan skáhppot jus olmmoš háliida.
– Adnongálvogávppit leat dát báikkit gos olmmoš sáhtášii gávdnat ain dakkár LP, čilge Falck.
Su dieđuid mielde guldalit olb
mot musihka jámma sihke LP- ja Cd-hámis.
– Birrasiid njeallje proseanta olbmuin návddašit musihka Lp-skearru guldaleami bokte. Seamma olu, njeallje proseanta olbmuin, dahket dan Cd-skearru bokte. Mii dahkat dan Cd-skearruid berošteaddjiid dihte.
Dássážii lea lágádus nagodan čoaggit 8 580 ruvnno mii lea 29 proseanta mihtus. 39 olbmo leat searvan ruđalaččat dasa.