Viimmat besset mánát mai
Dán vahkkus ásahuvvui Sámedikki vuosttaš mánáidforum. Dan bokte besset mánát muitalit makkár dilli sis lea ja dat galgá mielde hábmemin boahttevaš sámepolitihka. – Mun sávašin ahte Norgga skuvllain oahpaše eanet sápmelaččaid birra, lohká Oline (14) guhte geigii mánáidforuma resolušuvnna sámediggepresidentii.
Skábmamánu 2. beaivi šattai historjjálažžan go dalle ásahuvvui
Sámedikki vuosttaš mánáidforum.
Logi máná ja nuora čoahkkanedje
Romsii muitalit makkár skuvladilli sis lea ja makkár vuordámušat sis leat sámepolitihkkáriidda.
– Mu mielas lea hirbmat miellagiddevaš leat mielde mánáidforumis. Mun jáhkán ahte dán bokte lea vejolaš váikkuhit ja buoridit sámi mánáid ja nuoraid dili, lohká
14-jahkásaš Oline Ellingsrud
Menna Rafaelsen.
Mánáidforuma lahtut bohtet iešguđetge guovlluin Norggas, ja sis leat iešguđetlágan vásáhusat ja hástalusat.
Ohppet unnán sámiid birra
Oline orru Oslos ja muitala ahte doppe dihtet unnán sápmelaččaid birra.
– Go mun muitalan earáide ahte lean sápmelaš, de dadjet «kult». Eai sii jearat maidge sápmelaččaid birra, ja eat ge mii oahpa bálljo maidege skuvllas sápmelaččaid birra, lohká son.
14-jahkásaš lea oahpahallan sámegiela badjelaš jagi, ja muitala ahte sámegiel oahpahusa bokte lea oahpásmuvvan buorebut sámi historjái ja kultuvrii.
– Mun lean sámegiel diimmuin oahppan eanet sápmelaččaid birra go dan gávcci-ovcci jagis maid lean vázzán dáčča skuvllas. Dat lea mu mielas viehka heitot ja dat suhttada mu sakka. Sápmelaččat han leat oassin Norgga historjjás ja danne galggašedje sámiid birra maid oahpahit skuvllas.
Vuordámušat politihkkáriidda
Dán vásáhusa ja váilevašvuođa birra muitalii Oline mánáidforumas, ja dan ektui leat sus vuordámušat sámediggepolitihkkáriidda.
– Dán áigut ovddidit resolušuvnnas man geiget sámediggepresidentii. Mun ádden ahte eai sáhte čoavdit buot máilmmi váttisvuođaid, muhto sávan ahte barget dan maid sáhttet vai Norgga skuvllain geavahivčče eanet áiggi oahpahit mánáide ja nuoraide sámi kultuvrra, giela ja historjjá birra, lohká son.
Mánáidforuma čálii sierra dokumeantta deaivvadeamis ja geigii dan sámediggepresidentii skábmamánu 3. beaivvi. Ávvir ii dovdda olles resolušuvnna sisdoalu go Sámediggi ii leat vel almmuhan dán.
Ohppet mánáid birra
Ánde Issát Eira Juuso (11) lea maid mánáidforuma láhttu. Son vázzá Kárášjoga skuvlla 6. luohkás ja beasai mánáidforumii danin go čohkká ohppiidráđis.
– Mu mielas lea somá leat mielde mánáidforumis. Mii leat čállimin mii livččii buorre skuvllas ja mii lea heitot skuvllas. Mii leat maid hállan mobbema birra. Buori skuvllas eai galggaše mobbet ja buohkain galggaše skihpárat, lohká son.
Sus eai leat erenomáš vuordámušat politihkkáriidda, muhto son jáhkká mánáidforuma dehálažžan politihkkáriidda.
– Lea oalle buorre ahte mánát besset iežaset jiena geavahit go politihkkárat eai soaitte diehtit nu olu mánáid birra.
Ii buohkain leat buorre dilli
Christoffer Norvang (12) lea maid Kárášjoga skuvlla oahppi. Son muitala ahte loaktá ja ahte sus lea buorre dilli skuvllas.
– Lean gal gullan ahte ii buohkaiguin mana seamma bures skuvllas. Muhtumat givssiduvvojit skuvllas ja dalle eai háliidivčče skuvlii. Nu lea maiddái min skuvllas, ja lean gullan ahte mánáidskuvllas lea eanet givssideapmi go
nuoraidskuvllas, lohká son.
Mánáidforumis čalmmustahtte erenomážit skuvladili ja givssideami mii dáhpáhuvva skuvllain. Maiddái ráppár «Slincraze» dahje Nils Rune Utsi lei boahtán muitalit mo givssideapmi lea čuohcan sutnje.
Oahpásmuvvan
Olu áigi manai suokkardallat ja ságastallat hástaleaddji fáttáid birra, muhto mánát besse maiddái suohtastallat go čoahkkanedje Romssa gávpogii.
– Dáppe leamaš somá. Mii leat speallan mini-golfa vai oahpásmuvvat. Mu mielas lea hui somá deaivat ođđa olbmuid, muhto maiddái veahá issoras, lohká Christoffer Norvang.
Maiddái Ánde Issát Eira Juuso lei duhtavaš sosiála ovttastallamiin.
– Lei hui somá speallat mini-golfa ja borrat pizza. Mun lean oahpásmuvvan ođđa olbmuide, ja muhtumiiguin gal áiggun doallat oktavuođa.
Historjjálaš
Sámi mánáin ii leat ovdalaččas arena gos besset politihkkáriiguin gulahallat. Danin lea Sámediggi ovttas Redd Barna-organisašuvnnain ja givssidanáittardeddjiin čohkken ja ásahan mánáidforuma.
– Mii galgat guldalit mánáid ja sihkkarastit ahte sin oaivilat gullojit ja leat oassin sámi servodagas. Sámi mánáin leat iešguđetlágan vásáhusat sihke skuvllain ja mánáidgárddiin, ja mii dáhttut diehtit lea go sis buorre dilli, vásihit go givssideami ja eará hástalusaid. Mii háliidit maid diehtit maid galggašeimmet bargat mánáid ovddas. Sin cealkámušat galget vuođđun min viidásetbarggus, lohká sámediggeráđđi Mikkel Eskil Mikkelsen ja joatká.
– Dá lea Sámedikki vuosttaš formálalaš gulahallan mánáiguin ja nuoraiguin, nu ahte mánáidforuma ásaheapmi lea historjjálaš dáhpáhus.
Iežaset vásáhusat
Go Ávvir ságastallá sámediggeráđiin Mikkel Eskil Mikkelsenin, de ii leat vel ožžon mánáidforuma resolušuvnna. Son lea gealdagasas ja dadjá ahte mánáid vuordámušat
leat dehálaččat sin bargui.
– Sámediggi bargá álo sámi mánáid rivttiid ovddas, mánáid oahpahusa ektui ja psykososiála dili ovddas sihke skuvllas ja
mánáidgárddis. Dán oktavuođas leat vuohttán ahte eat leat gulahallan doarvái mánáiguin. Sámedikkis dárbbašit dán gelbbolašvuođa ja mánáiguin galgá miel