– Sámi jienastusloh go lágideimmet sá
Giehtavuonas, Mátta Romssas, lea sámi jienastuslohku lassánan maŋŋá go guoktásat áŋgirušaiga lágidit sámi doaluid gielddas.
Liv Kristin Hansen ja Nina Johanne Nobuk Johansen ássaba Giehtavuonas, Mátta Romssas. Dáppe lea dáruiduhttin leamas garas. Moatti jagis lea jienastuslohku lassánan gielddas ja soai doaivuba ahte sámevuohta lea ealáskeame gielddas.
Nina Johanne ohcagođii iežas sámi ruohttasiid. Iežas vuosttas gávtti son goarui gonagasdoaluide mat ledje Romssas 2017:s. Girjerájusbargi Liv Kristin ordnii logaldallama Nina Johanne ja Giehtavuona gákteárbevieruid birra girjerádjosis. Dan rájes smávva
gielddas Mátta-romssas olusat háliidit gullat Giehtavuona sámi gákteárbevieruid birra, man eai leat ságastan guhkes áigái.
– Muhtumat eai leat ságastan guhkes áigái sámevuođa birra, máŋgga bulvii, vaikko dihtet sis leat sámi ruohttasat. Dovddan ahte olusat háliidit ohcagoahtit iežaset sámi máddariid dáppe Giehtavuonas, go lea máŋgga buolvva leamaš garra dáruiduhttin dán guovllus. Olusat de háliidit váldit muinna oktavuođa ja háliidit diehtit eambbo, muitala Nina Johanne.
Deaŧalaš servodahkii
Liv Kristin Hansen bargá Giehtavuona girjerádjosis, ja bargá lávdegottis mii lágida Sámi álbmotbeaivvi doaluid Giehtavuonas juohke jagi. Son muitala ahte Nina lea deaŧalaš servodahkii go čalmmustahttá sámevuođa sin smávva
servodagas gos ásset sullii 3000 olbmo.
– Nina duostá muitalit iežas eallima birra, mot son lahkonisgođii iežas sámevuođa. Olusat váldet suinna oktavuođa ja mii dárbbašit su duostilvuođa ja áŋgiruššama dáppe, čilge Liv Kristin.
Sámi álbmotbeaivvi doalut
Nina muitala ahte Giehtavuonas lágidišgohte 2018 rájes Sámi álbmotbeaivvi doaluid. Romssa
fylkkajuoigi Marja Mortenson bođii juoigat ja Máret Rávdna Buljo ráhkadii sámi borramuša dáppe.
– Bohte ollu olbmot min Sámi álbmotbeaivvi doaluide. Lei nu somá ja visot biebmu nogai. Olbmot ledje nu duhtavaččat, ja dalle ásaheimmet Sámi lávdegotti mii dál lágida doaluid juohke jagi, dadjá son.
Sámi vahkku
Giehtavuona Sámi vahku
prográmma bistá dál guokte vahku, guovvamánus. Historjájoavku lea maid mielde ja ráhkada doaluid, leat girjealmmuheamit ja čájáhusat.
– Sámi jienastuslohku lea lassánan maŋŋá go leat lágidišgoahtán almmolaš sámi doaluid. Go mun cokkan gávtti, de bohtet olbmot ja háliidit ságastit sin sámi duogáža birra ja ohcat iežaset sámi ruohttasiid.