Netflix ohcá dál sámi filbmačálliid
– Sámis leat olu čeahpes muitaleaddjit. Mii háliidit gaskkustit dán muitalanárbevieru eambbo gehččiide cealká Internašunála Sámi Filbmainstituhtta.
Sámi Filbmainstituhtta (ISFI) ja Alma Education ovttasbarggus Netflixain álggahit dál «ISFI / Alma x Netflix Čállinakademiija»,
mii lea ođđa gelbbolašvuođaprográmma sámi giehtačálliid várás. Nu čállet preassadieđáhusas.
– Čállinakademiija vuolggasadji lea ahte čállit ohppet dáidduset buoremusat go besset jotkkolaččat hárjehallat. Guhtta sámi čálli válljejuvvojit oassálastit, ja Alma Education giehtačálusfakultehta bagadallamiin galgá juohkehaš ráhkadit originála guhkesfilbmagiehtačállosa dahje tv-ráidoevttohusa ja pilohtagiehta
čállosa 13 vahkkus, čállá ISFI.
Joavkobargguid bokte
Sii čilgejit ahte bargobájis leat golbma dási. Vuosttaš dásis deaivvadit dat guhtta oasseváldi iežaset bagadalliiguin viđabeaivásaš bargobájis gos galget hárjehallat bargat ovttasbargobirrasis ja hukset searvevuođadovddu. Maŋŋel deaivvadit oasseváldit joavkun dábálaš vahkkosaš neahttadeaivvademiin ovttas iežaset bargobádjejođiheddjiin. Dáin deaivvademiin
ráhkada juohke čálli vuos giehtačállosa álgoevttohusa dahje tv-ráido-konseaptta njealji vahkkus. Dasto čállet giehtačállosa čuovvovaš gávcci vahkkus, lagas ovttasbarggus Alma muitalusdoaimmaheddjiiguin.
Neahttadeaivvademiid oahpahusa lassin lágiduvvojit measttirluohkát maid Netflix-jođiheaddjit ja guovddáš tv-ráido-lágideaddjit ja čállit miehtá Davviriikkaid láidestit.
Loahpas prográmma áigodagas
oasseváldit besset ovdanbuktit prošeavttaideaset Netflixii ja eará filbmaovddasteddjiide davviriikkain. ISFI čilge ahte ohccit berrejit čállán unnimustá ovtta guhkesfilbmagiehtačállosa, Tv-drámá-giehtačállosa dahje ovtta buvttaduvvon oanehisfilbmagiehtačállosa.
Marit Elin Keim maritelin@avvir.no