Ávžžuha váhnemiid LEAT ÁICILAT
– Mii háliidit čájehit váhnemiidda ahte dat dáhpáhuvvá, ja háliidit ahte váhnemat dihtet ahte sin mánát maid sáhttet dahkat dan, muitala bajit politiijabálvá. Seksuálaláhkarihkkuma šokčanjoavkku ođđa raporta čájeha ahte 5-jahkásaš mánát juhket seksuálalaš filmmaid interneahtas.
Leat sihke gánddat ja nieiddat gaskkal 5 ja 13 jagi, geat juhket filmmaid sosiála mediain. Nuoramusat geavahit váhnemiid geavaheaddjekonttuid go juhket, ja juhket dábálaččat Youtubes.
Boarraset mánát juhket maid Youtubes, muhto eanemusat TikTokas. Olu mánáin leat seksuálalaš geavaheaddjenamat, dahje go juhket de bidjet seksuálalaš sisdoalu bajilčálán dahje čilgehussii.
Váhnemat fertejit áicilat
– Duođalašvuohta filmmain maid juhket molsašuddá. Muhtumat juhket filmmaid gos dánsejit ja ii leat báidi badjelis, earát ges juhket filmmaid gos čájáhaddet vuolledábiid. Nuoramusat juhket eanemusat filmmaid gos čájáhaddet vuolledábiid ja bađa, ja boarraset mánát ges filmmaid mas njávkkadit iežaset, čilge Kripos bajit politiijabálvá Thale Parker preassadieđáhusas.
Eanaš mánát filbmejit ieža. Unnitlogu filmmain oidnojit eanet go okta máná, dahje vuhtto ahte lea nubbi mánná gii lea filbmen.
– Mii háliidit ahte váhnemat leat áicilat, ja sáhttet muitalit mánáideaset makkár váikkuhusat dákkár filbmajuohkimis sáhttet leat. Mii sávvat ahte váhnemat bissehit mánáid juohkimis dákkár filmmaid, muitala Kripos bajit politiijabálvá Hanne Andreassen.
Mudde ja hála
– Váhnemiin lea vejolaš mánáid digitála eallima dáhkat oadjebassan, go čuvvot rávvagiid. Váhnemat fertejit beroštit ja geahččat makkár áppaid mánát vižžet iežaset telefovnnaide ja ipadaide, ja fertejit maiddái muddet geavaheami, čilge Andreassen.
Andreassen čilge ahte lea seammás dehálaš oahpahit mánáide sosiála media- ja interneahttageavaheami. Mánát leat sáhkkit, ja ohcet olu iešguđetlágan sisdoalu neahtas, ja lea váhnemiid ovddasvástádus muddet sin.
– Lea dehálaš ahte váhnemat hállet seksuálalaš filbmajuohkima birra. Mánát eai jurdil eaige fuomáš ahte dat maid dahket ii leat buorre, eaige máhte jurdilit váikkuhusaid juohkimis.