Sámi nuoraide lea SEARVADAHTTIN JA GIRJÁIVUOHTA DEHÁLAŠ
Eai goassege ovdal leat Arctic Pride/arktalaš girjáivuohtafestivála parádas leamaš nu olu olbmot go dán jagi. Máŋga duhát olbmo oassálaste, ja sin searvvis lei maiddái Noereh-organisašuvdna.
Mannan lávvardaga lágiduvvui Arctic Pride/arktalaš girjáivuohtafestivála paráda Romssa gávpogis. Máŋga duhát olbmo, organisašuvnna ja fitnodaga ledje boahtán ávvudit rájáhis ráhkisvuođa ja girjáivuođa.
– Olu giitu buohkaide geat lehpet boahtán. Mis lea ođđa olahus ja dat lea mearehis somá. Romssas eai leat goassege oassálastán ná oallugat parádas, logai Arctic Pride/arktalaš girjáivuohtafestivála jođiheaddji Lars Kaupang maŋŋel parada-vázzima.
Parádas oassálastii maiddái Noereh-organisašuvdna.
Dehálaš
– Parádas lei buorre mokta ja miellaláhki. Mii leimmet ávžžuhan olbmuid čiŋadit gávttiiguin vai sápmelaččat leat eanet oidnosis ja maid go odne lea Gákteidja. Lei hávski oaidnit gávttehasaid parádas ja lei maid hui somá ahte dat sápmelaččat geat ledje boahtán geahččat paráda ledje coggan gávttiid ja váldán fárrui Sápmipride-leavgga, lohká Noerehjođiheaddji Lars-bjørnar Nøstan Knutsen.
Noereh lea sámi nuoraidorganisašuvdna mii vuođđuduvvui 2009:s. Noereh áŋgiruššá iešguđetge servodatáššiin. Sii leat leamaš earret eará mielde organiseremin Sápmi Pride doaluid ja sii dat álggahedje Gáktebeaivvi mii láve cuoŋománus ja Gákteija mii lea skábman.
– Midjiide lea hui dehálaš ovddidit searvadahttima ja girjáivuođa go Noereh lea organisašuvdna buot sámi nuoraid várás. Go oassálastit parádas, de čájehit ahte midjiide lea dehálaš láhčit oadjebas arenaid gos buohkat galget leat dohkkehuvvon, lohká Knutsen.
Viimmat besse čoahkkanit
Noereh galggai oassálastit oaivegávpoga parádas mannan geasi, muhto Oslo Pride šattai šluhttet buot doaluid báhčimiid dihte mat dáhpáhuvve Oslo gávpotguovddážis geassemánu 25. beaivvi.
Muhtin dievdu bážii ja gotti guokte olbmo, dasa lassin roasmmehuvve badjel 20 olbmo. Politiijat navdet dán terrordahkun ja ballet ahte vearredahkkis lei áigumuššan fallehit LHBT+ olbmuid geat oassálaste Oslo Pride festiválas.
– Noereh galggai oassálastit Oslo parádas mannan geasi, muhto das ii šaddan mihkkege. Danin lei hui buorre ahte viimmat beasaimet fas čoahkkanit parádii dáppe Romssas, lohká Knutsen.
Vásihii báhčimiid
Noereh-jođiheaddji Lars-bjørnar Nøstan Knutsen lei Oslo Pride oasseváldi mannan geasi ja son lei Rosenkrantz gáhtas gos báhčimat dáhpáhuvve.
– Maŋŋel báhčimiid lea pride
šaddan vel deháleabbot ja dárbbašlažžan go dát arena han lei bonju norgalaččaid oadjebas deaivvadanbáiki. Maŋitáiggis leamaš munnje ja olu earáide váttis muitalit rahpasit ahte leat bonju-olbmot, lohká son ja joatká:
– Pride lea hirbmat dehálaš go galgat ain bargat rivttiid ovddas
ja ovdánahttit searvadahttima. Pride doaluin galgá maid dovdat gullevašvuođa ja suohtastallat. Seammás galgat maid čájehit girjáivuođa vai lhbtiq+-joavku šattašii dábálažžan maiddái sidjiide geain leat ovdagáttut min vuostá. Olu riikkain eai leat dáinna bargguin lihkostuvvan maŋimuš jagiid ja Norggas ges oaidnit ahte leamaš garra digaštallamat dan ektui, loahpaha son.
Romssas loahpahuvvui Arctic Pride/arktalaš girjáivuohtafestivála ikte, skábmamánu 12. beaivvi.
Kila Anti