Sáhpániid

Dán vahkkoloahpa livčče galgan spábbačiekčamat maid namma lea Ávvir Cup. Mun, aviisasáhpán, dieđusge lean guhká juo gullan aviisabargiid ráhkkaneame dáidda čiekčamiidda.

Mus gal maid šattai spábbačiekčanmiella go oidnen earáid čiekčame. Doama doama njulgejin ruovttuguvlui ja dieđihin buohkaide doppe ahte dál de šaddá sáhpániid spábbačiekčangilvu.

Mii juohkileimmet jođánit sáhpániid guovtti jovkui ja bidjen namaid daidda: Viessosáhpánát ja Vuovdesáhpánat.

Ieš mannen Viessosáhpániid jovkui, go mun gulan daidda sáhpániidda geat leat huksen bieju čihkosii muhtun vissui. Jus ehpet dieđe dan, de sáhtán muitalit ahte min bearaš orru aviisaviesu gealláris. Danne gohčodit min viessosáhpánin.

Min joavkkus, Viessosáhpániid joavkkus, ledje mielde moallaolmmái Civkká, suodjalusčiekčit Gálke ja Gelke, gaskašilljočiekčit Unni ja Bunni, ja falleheaddjit Biippá ja mun, aviisasáhpán.

Ledjen hui buori movttas go álggiimet, go ii hal dien spáppa gal sáhte nu váttis čievččastit mollii. Čiekčamat álge. Min moallaolmmái bijai johtui čiekčamiid. Čievččastii spáppa nu bajás áibmui ahte ii oba orron ge ollemin fas vulos. Dat loahpas goit goaikkehii mu šilljui. Gullui dušše BOŊK! Gálke lei snáhppáseamos, ruohtastii spáppain min guvlui nu ahte dakŋasat vel ihte muohttaga vuolde. Gálke čievččastii spáppa viidáseappot Biippái. Biippá jorahii spáppa birratbirra nu snáhppát ahte ii oktage báljo oaidnán gosa ain livkkiha dainna. Loahpas Biippá goit goitge čievččastii spáppa mu guvlui. – Vuoi, vuoi, jurdilin. Dál ii leat mus go čievččastit spáppa njuolga mollii. Oidnen rabas moala ja válddestin buori leahtu ovdal go čievččastin spáppa dan guvlui. Njuikejin juo maŋŋejulggiid ala ja huikigohten olles čoddagiin: MOALLA! Dan in livčče galgan dahkat. Juste go lei jur ollemin spábba moallesázu badjel, de spábba deaivvai bovnna ja fierragođii áibbas eará guvlui.

Vaikko dalle čiegadin dan, de sáhtán goit dutnje, gii leat mu ustit, muitalit ahte ribahin moadde gatnjala golggihit de. Muhto, in mun guhká skurdnján. Jotkkiimet čiekčama, ja lihkus šattai boađus 12-12. Dat mearkkašii ahte ii goabbá ge joavku vuoitán – dahje rievtti mielde ahte goappešat joavkkut vuite.

Gulahallat fas boahtte vahkku!