SÁMI SUOHKANIIN njiedjá olmmošlohku
Dán jagi goalmmát kvártala lea sámi suohkaniid olmmošlohku njiedjan 76 olbmuin. Dássážii dán jagi lea sámegielaid hálddašanguovllu olmmošlohku njiedjan 0,70 proStatistihkalaš guovddášdoaimmahaga logut čájehit ahte sámi suohkaniin njiejai olmmošlohku 2022 goalmmát kvartálas. Oktiibuot njiejai olmmošlohku 76 olbmuin dahje 0,24 proseanttain ovddit kvartála ektui.
Sámegielaid hálddašanguovllus ásset dál 32 041 olbmo. Jahkemolsuma rájes lea olmmošlohku njiedjan oktiibuot 0,70 proseanttain.
Eanemus njiedjan
Sámegielaid hálddašanguovllus leat 12 suohkana, ja čieža suohkanis njiejai olmmošlohku mannan kvartála.
Hápmiris njiedjá olmmošlohku eanemusat, mannan áigodaga njiedjá olmmošlohku 22 olbmuin dahje 0,89 proseanttain. Dássážii 2022:s lea olmmošlohku njiedjan 1,51 proseanttain, ja dat lea nubbin eanemusat buot sámi suohkaniin.
Dássážii dán jagi lea Raarvihkes njiedjan olmmošlohku eanemusat, namalassii 2,04 proseanttain. Mannan áigodaga njiejai olmmošlohku 0,69 proseantta.
Muđui njiedjá olmmošlohku mannan áigodaga maiddái Unjárggas, Deanus, Porsáŋggus, Guovdageainnus ja Dielddanuoris.
Lassáneapmi
Viđa sámi suohkanis ges lassána olmmošlohku. Mannan kvartálas lassánii olmmošlohku eanemusat Aarporte suohkanis, olmmošlohku lassánii logi olbmuin, dahje 0,78 proseanttain. Aarportes lea maid muđui eanemus lassáneapmi dán jagi, namalassii 1,41 proseantta.
Loabágis lassánii olmmošlohku golmma olbmuin, dahje 0,31 proseanttain. Suohkanis lea jahkemolsuma lassánan olmmošlohku 0,82 proseanttain.
Kárášjogas lei maid olmmošlaskan mannan kvartála, olmmošlohku lassánii čiežain olbmuin, dahje 0,27 proseanttain. Jus geahččá obbalaččat Kárášjoga olmmošlogu 2022 ovddas, de lea dattege olmmošlohku dássážii njiedjan -1,16 proseanttain.
Gáivuonas, Snåases ja Rossenis lea maid olmmošlohku lassánan mannan áigodaga.
Kila Anti