Deike lea vejolaš hukset 29 ođđa viesu
Unjárgii lea ásahuvvon ođđa ásodatbáiki. Gielda skeŋke viessosajiid sidjiide geat háliidit hukset viesuid.
Luemeravda lea ođđa ásodatbáiki gaskal Vuonnabađa ja Nyborga. Deike leat ásahuvvon 29 viessosaji.
– Jus mii háliidit ahte olbmot galget duddjot viesuid, de fertet láhčit dili nu ahte ožžot dán vejolašvuođa. Mis leat dál gárvves viessosajit jus muhtimat háliidit duddjogoahtit, lohká Unjárgga sátnejođiheaddji Knut Store.
Unjárga lea smávva gielda gos ásset 856 olbmo. Sátnejođiheaddji gal ii jáhke ahte ođđa ásodatbáikái huksejuvvojit 29 ođđa viesu.
– Dan gal in jáhke, muhto muhtimat leat jearahan viessosajiid. Dieđán ahte muhtin áiggošii duddjot vistti geassái, ja son áigu odne jo fitnat dáppe.
Čáhci dearvvašvuođaguovddážii
Unjárggas lea dárbu ođđa viessosajiide, muhto Luemeravda lea ásahuvvon maiddái eará sivaid geažil.
– Mii leat ráhkadan ásodatbáikki vai dearvvašvuođaguovddáš Nyborgas maid oažžugoahtá Stuoravuonačázi. Dá lea váldosivva ásaheapmái go dalle ožžot doppe maid buori čázi, lohká Store ja joatká:
– Stuoravuonačáhci boahtá gitta Vuonnabahtii, ja dál lea dát čáhci maiddái biddjon dan 29 ođđa viessosadjái. Stuoravuonačáhci joatká gitta Nyborga gáljavuodjinbána rádjai.
Nuvttá viessosajit
Unjárgga gielddas leat geahččaladdan iešguđetge doaibmabijuid vai olmmošlohku lassánivččii. Sii fállet earret eará nuvttá viessosajiid.
– Ođđa viessosajit leat maid nuvttá, olbmot mákset dušše symbolalaš supmi gildii, 5000 ruvnnu, lohká sátnejođiheaddji Knut Store.
Ođđa ásodatbáikkis leat gávcci priváhta viessosaji ja muhtin viessosajit leat Finnmárkkuopmodaga (Fefo) eatnama alde.
– Eai buot viessosajit gula gildii. Mis lea váldi juohkit Fefo viessosajiid, muhto jus háliida priváhta viessosajiide duddjot, de ferte váldit oktavuođa eaiggádiiguin. Dat leat maid regulerejuvvon viesuide.
Hálbbes orrunguovlu
Unjárgga gildii lea dehálaš bisuhit olbmuid ja sii áinnas háliidit maiddái ođđa ássiid iežaset gildii.
– Mis leat nuvttá orrunsajit go geahččalit oažžut deike eanet olbmuid ja vai ássit duddjoše viesuid deike, lohká Store.
Unjárgga gielddas leamaš nuvttá viessosajit olu jagiid, ja sátnejođiheaddji muitala maiddái eará buriid birra.
– Unjárggas ii leat opmodatvearru nu go masá buot eará gielddain leat. Jus buohtastahttá eará gielddaiguin, de leat mis maiddái hálbbes gielddalaš divadat. Huseiernes Landsforbund iskkadeapmi čájehii ahte Unjárggas lea nubbin hálbbimus orrut Finnmárkkus. Dušše Ákŋoluovtta gielddas leat uhcit orrungolut go mis.
Váldit oktavuođa
Unjárgga sátnejođiheaddji sávvá ahte olbmot háliidit hukset viesuid Luemeravdii.
– Jus olbmot háliidit duddjot, de sáhttet gielddain váldit oktavuođa. Dáppe fidnejit viessosaji jođánit. Jus háliidit hukset jo geassái, de sáhttit dál jo bargagoahtit báberbargguiguin, loahpaha Store.
Kila Anti kila@avvir.no