Ožžon doarjaga lágidit
Skuohtanjárga velforening lea ožžon 7000 ruvnnu Finnmárkkuopmodagas lágidit mánáide doaimmaid.
Finnmárkkuopmodaga (Fefo) «Giisá Ruoná doarjagat» lea juolludan Skuohtanjárga velforeningii ruhtadoarjaga čađahit orohaga mánáide ja nuoraide doaimmaid.
Fefo ruoná doarjagat galgá doarjut lasi olgoáibmodoaimmaid ja luonddugeavaheami. Ruhtadeapmi addo doaibmabijuide
main lea rumašlaš lihkadeapmi ulbmilin.
Skuohtanjárga velforening lea geavahan ruđaid gárddástaladettiin Ruoššamuotkkis 2021 ja 2022 čavčča.
Govvagalleriijas oainnát iešguđetge doaimmaid maid leat čađahan Giisá ruoná doarjagiin.
Iešguđetge doaimmaid bargan guovtti jagis
Oassálastima bokte galget mánát gullat ja fáhtet sániid ja doahpagiid, mat gullet iešguđetge doaimmaide.
Doaimmat leat leamašan árbevirolaš lávu cegget, duorggaid čuollat, lávu duorggastit. Sii besse maid lávostallat sierra lávus. Besse vásihit ollesolbmuid bargguid gárddástaladettiin; čorragiid gárdái buktit, miessegilkorastima, miessemearkuma, niestebohcconjuovvama, bohccobuktagiid rádjama.
Unnimusat veahkehedje ollesolbmuid viššalit vara fierrut amas gieluluvvat, besse varragáhkuiguin herskostallat.
Nuoramusat stohke, erenoamážit bohccostalle ja njorostalle.
Dien láhkai besse oahppat suohpana njámmat, njoarostit ja oahpahallet darvehit. Stuorábuččat fas áinnas njorostalle gilvvu eará bargguid gaskkas.
2021 čavčča lei maiddái mánáide fálaldat Sarela Gårdas Leavnnjas gos besse riidet.
– Mii giitit Finnmárkkuopmodaga Giisá Ruoná doarjagat ruhtajuolludeami ovddas, čállá Marit Guttorm Skuohtanjárga velforeningas.
Njeallje miljovnna
Finnmárkkuopmodaga árvvut galget boahtit ásaheddjiide buorrin. Danin leat sii álggahan Giisá.
– Min giisá lea devdojuvvon árvvuiguin Finnmárkku luonddus. Dat galget geavahuvvot duohtan dahkat mat ovdánahttet Finnmárkku luonddu ja kultuvrra eavttuid vuođul.
2021:s juhkkojuvvui oktiibuot 4,1 miljovnna ruvnnu Finnmárkui Giisá čieža doarjjaortnegiid čađa.
Alf Berg Grønnli alf@avvir.no