Sámi pop-komehta njuike
Munch-lávdái boahtte vahkkoloahpa
Katarina Barruk lea ilus go beassá iežas eatnigiela ovdanbuktit musihka bokte dán lávddis, giela mii lea garrasit áitojuvvon.
Katarina Barruk šattai dovddusin olles riikkas go almmustahtii skearru «Ruhttuo» mannan čavčča. Su musihkka lei juoga ođas ja áibbas earenoamaš musihkkamáilmmis, go lea pop-hámis ja áitojuvvon ubmisámegillii.
Bearjadaga njukčamánu 24. beaivvi lea son allaárvosaš Munchmusea lávddis, ovttas Elina Waage Mikalseniin, earenoamáš konsearttas mas guokte sámi musihkkara čatnaba oktii vássánáiggi ja boahtteáiggi. Nu čállá musea preassadieđáhusas.
– Barrukis lea dehálaš jietna
– Mii háliidit loktet ovdan dálá ođđahutki dáiddáriid ja musihkkáriid. Katarina Barruk lea dehálaš ođđa jietna Norgga popmusihkas. Son lávlu áitojuvvon gillii, ubmisámegillii, ja ráhkada áidnalunddot musihkalaš lanja mas lea sihke raššivuohta ja fápmu, muitala Munch Live dáiddalaš jođiheaddji Ingrid Moe preassadieđáhusas, ja joatká:
– Olbmot sáhttet vuordit garra popkonseartta. Illudan maiddái vásihit áibbas ođđa ovttasbarggu gaskal Katarina, ja dáiddára ja musihkkára Elina Waage Mikalsena.
Moe čilge viidáseappot ahte dát šaddá áibbas earenoamáš ovdanbuktin guvttiin láidesteaddji ja hutkás artisttain. Son lohká ahte Katarina Barruk musihkka lea fámolaš, seammás go das lea duođalašvuohta ja hearkivuohta, oktan su máŋggabealat vokálain.
Čállá buot upmisámegillii
Katarina Barruk lohká illudit čuojahit doppe.
– Maŋimuš jahki lea leamaš earenoamáš gelddolaš musihkalaččat ja mun illudan. Lea gudni go beasan leat mielde doppe čuojaheamen. Lean hirbmat ilus go Munch háliidii leat mielde dán prošeavttas. Dat lea hui mávssolaš, ii leat nu dávjá ahte sihke ubmisámi ja mearrasámi kultuvra bohtet oktanaga dákkár lávdái, čilge Barruk.
Katarina Barruk čállá lávlagiid iežas eatnigillii, ubmisámegillii. Dát lea okta dain eanemusat áitojuvvon sámegielain máilmmis ja lea biddjojuvvon UNESCO rukseslistui. Su skearru lea diehttalasat oassin giela seailluheamis ja nannemis. Son čilge ahte lea áibbas dárbbašlaš sutnje lávlut ubmisámegillii, ja ahte son lea čeavlái go beassá čájehit giellaárbbi.
– Mun čálán buot iežan musihka máilmmi fiidnámus gillii, ubmisámegillii. Mus ii leat válljenmunni. Mun in daga dan duođaštan dihtii maidege, muhto dás lea sáhka ahte mun beasan leat dat gii mun lean. Lea maid mu vuohki bovdet ustibiid ja gehččiid mu universii, gos ubmisámegiella lea norbman, áibbas áigeguovdil ja ealli, dadjá Katarina Barruk.