– Illudan almmuhit iežan ođđa juoiganskearru
Sámi artista ja juoigandutki Anna Näkkäläjärvi Länsman lea ožžon doarjaga Suoma beale Sámedikki kulturlávdegottis buvttadit iežas juoiganskearru mas leat árbevirolaš luođit.
Sámi artista ja juoigi Anna Näkkäläjärvi Länsman lea dutkame luđiid ja juoigama birra iežasnákkosgirjjis University of Art Helsinki musihkkaoahpahusas. Dutkamii gullet maiddái dáiddalaš oasit, muitala son.
– Mu dutkamii gullet maid dáiddalaš oasit nu go doallat konsearttaid ja almmuhit skearruid.
Miessemánus mus lei konsearta Helssegis musihkkadálus gos juigen sihke árbevirolaš hámis ja luđiid main lei duogášmusihkka, muitala son.
Ohcan arkiivvas luđiid
Näkkäläjärvi Länsman čilge ahte son lea ohcan ja hárjehallan boares arkiivaluđiid ja ráhkadan ođđa luđiid iežas nákkosgirjjis.
– Lei olu dutkamuš ja bargen olu daid luđiiguin maid mun maŋŋel juigen konsearttas Helssegis. Dasto háliidin ohcat ruhtadeami báddet daid luđiid ja almmuhit daid. Nu ohcen ge doarjaga Sámedikkis, čilge Anna.
Doarjja Sámedikkis
Dál lea Suoma beale Sámedikki kulturlávdegoddi juohkán kulturdoarjagiid, ja Anna oaččui 5000 euro buvttadit iežas luohteskearru.
– Lea hui somá ahte lean ožžon dan doarjaga ja sáhtán dál báddet ja almmuhit daid dološ luđiid. Mearkkaša hui olu ahte sámi lágádusat dorjot mu, ja organišavudna oaidná mu barggu deaŧalažžan. Muđui ii livčče vejolašge almmuhit dakkárlágan dáiddalaš musihka. Luohti ii dárbbaš rievdat, lean juoigan nu go luohti lea ja muhtumin lea musihkka duogážis, čilge son.
Almmuhit
Annas lea dál plána čohkket ámmátmusihkkáriid ja hárjehallat singuin dološ luđiid maid son lea čohkken arkiivvas. De sii áigot báddegoahtit ja buvttadit skearru.
– Mun juoiggan ja dasto leat mus ámmatmusihkkárat. Mis lea plána almmuhit ođđa luohteskearru boahtte jagi, 2024:s. Mus ii lea hoahppu ja háliidan ahte šaddá buorre ja háliidan ráfis bargat, dadjá son.
Bálkkašupmi
Kulturlávdegoddi jugii maiddái 2023 kulturbálkkašumiid. Kulturbálkkašupmi addo ohccái gii lea bargan mearkkašahtti barggu sámi kultureallimii buorrin.
– Dán jagi oažžu Anja Kaarret, gii lea Anáris eret, bálkkasumi, son lea bargan eanet go 25 jagi anárašgielat doaimmaheaddjin Yle sámegieldoaimmahusas. Anárjohkalaš Marja-liisa Laiti lea bargan olles eallima dujiin dehe duodjeoahpaheaddjin. Maiddái Marja Näkkäläs, Neakkelis, Eanodagas eret, lea duodji leamaš stuora oassi su eallimis mii oidno su árvvuin ja eallindábis, čilge Suoma beale Sámedikki kulturlávdegoddi kulturčálli Riitta Orti-berg.
Kultuvrbálkkasupmi lea 3000 euro. Suoma beale Sámedikki kulturlávdegoddi jugii doarjagiid sihke sámi servviide ja kulturbargiide miehtá Suoma, oktiibuot 236 000 euro ovddas.
Visot doarjagiid maid Suoma beale Sámedikki kulturlávdegoddi lea juohkán, oainnát dás.