Vuittii vuosttaš ja nuppi gilvvu
Norgga cupa nubbi heargevuodjingilvu lágiduvvui mannan sotnabeaivvi Guovdageainnus. Dalle ledje dušše joavkovuodjimat ja finálat.
Nubbi heargevuodjingilvu lágiduvvui sotnabeaivvi. Vuoiti lei «Aurora» man Nils Jøran Eira ja Mikkel Jonas Eira eaiggáduššaba. Vuoddji lei Mikkel Jonas Eira. Earru lei 3/100 sekundda 1. ja 3. saji gaskkas. Soai vuittiiga lávvordaga maiddái.
– Lei hui somá vuoitit ja somá fas vuodjit. Lei buorre dovdu. In lean gal doivon vuoitit, doppe leaba guokte čeahpes heargedápmi, John Isak Sara ja Klemet Amund Eira, muitala seniorvuoiti Mikkel Jonas Eira.
Son muitala ahte lea moadde jagi vuodján, ja maŋimuš gilvu lei diibmá.
– Lei heajos siivu gal, ii lean optimála siivu, muhto muđui gal lei buorre. Ledje somás gilvvut.
Mikkel Jonas lei mielde klipsavuodjimis duorastaga.
– Dan beaivvi nagodedje gávcci hearggi klipset. Lea somá oaidnit ođđa kuskkaid ja heargeeaiggádiid. Lean kánske dat gii lean eanemus vuodján, diibmá ja ovddit jagi ledjen ođđaseamos kuska. Leat boahtán ođđa vuoddjit, mii lea hui somá, dadjá son.
Sotnabeaivvi gilvvuin bođii «Muzet Ena» nubbin, ja dan hearggi eaiggát lea John Isak Sara. Vuoddji fas lea Inga Karen Marit Sara.
Goalmmádin bođii «Supertom», eaiggádat leaba Tom Högli ja Mikkel M. Vuoddji lea Biret Julianne.
Njealjádin bođii «Vilgut», eaiggát lea Klemet Amund. Vuoddji lea Mikkel A. O. Eira.
Oktiibuot ledje njeallje hearggi gilvaleamen seniorluohkás sotnabeaivvi.
Lágideaddji Duottar Herggiid jođiheaddji Aslak Sokki lea duhtavaš vahkkoloahpa gilvvuiguin.
– Lei hui movttiidahtti min unna valáštallamii. Doaluid bealis, vaikko lei issoras dálki lávvordaga, eat vuordán olu gehččiid, muhto dat ledje boahtán muhtumat. Dat mii lei hui somá lei ahte ledje olu ođđa vuoddjit, sihke junior- ja seniorvuoddjit. Bohte guokte ođđa juniora geat eaba lean gilvalan ovdal. Lei issoras somá oaidnit ahte mis lea beroštupmi heargevuodjimii, muitala Sokki.
Son dadjá ahte sotnabeaivvi ges lei beaivvádat beaivvi miehtá.
– Dat mainna mun nohkken sotnabeaivvi eahket ledje dušše positiiva jurdagat. Moadde smávva teknihkalaš váttisvuođa, muhto dat ii hehtten min movtta. Beare somás vahkkoloahppa. Leat duhtavaččat, buohkat ledje duhtavaččt, dadjá son.