Bivdá doahttalit mearraluossabivdiid
Sámediggepresideanta Silje Karine Muotka (NSR) ii leat duhtavaš proseassain mii lea čađahuvvon jagi 2023 mearraluossabivddu regulerenevttohusaid oktavuođas. Son bivdá ráđđehusa guldalit ja ráđđádallat mearraluossabivdiiguin.
Muotka sakka vuorjašuvvá dainna movt eiseválddit leat meannudan mearraluossabivdiid dán jagi luossa- ja ruoššaluossabivddu regulerenevttohusa oktavuođas Finnmárkku mearas.
– Mun lean hirpmahuvvan go ovddasvástideaddji eiseválddit, almmá ovddalgihtii ráđđádallamiid dahje proseassaid, evttohit láhkaásahusa mii bisseha árbevirolaš mearraluossabivddu, mii lea guovddáš oassi mearrasámi kulturvuđot ealáhusdoaimmaheamis, dadjá Muotka preassadieđáhusas.
Dáhttu ođđa regulerenevttohusa
Sámediggepresideanta bivdá Dálkkádat- ja birasdepartemeantta botket proseassa, ja fuolahit ahte ráhkaduvvo ođđa ja buoret regulerenevttohus ovttasráđiid mearraluossabivdiid organisašuvnnaiguin.
– Ovdal go evttohus sáddejuvvui gulaskuddamii, de lei galgat ráđđái váldit mielde sin geain lea eanemus vásáhus ja geavatlaš máhttu dan birra movt mii galgat oažžut beaktilis ruoššaluossabivddu mearas, dadjá Muotka.
– Evttohus, mii sáddejuvvui gulaskuddamii bearjadaga, lea suhttadan oallugiid geaidda dat váikkuha, ja lea čielggas ahte dat ii leat doarvái buorre. Proseassain leat badjelgeahččan sihke min ja guoskevaš sámi beroštumiid. Nu ii sáhte dahkat, dadjá Muotka, guhte oaivvilda ahte eiseválddit leat láhtten allamielalaččat.
Váillaha ráđđádallamiid
Sámediggi ii diehtán ovddalgihtii dás maide.
– Dán vahkkoloahpa leat máŋga mearraluossabivdi váldán oktavuođa muinna go leat suhttan ja beahtahallan, sihke dainna mii lea árvaluvvon ja go eai leat váldon mielde ráđđái, lohká Muotka.
Sihke Finnmark Sjølaksefiskeforening, Sør-varanger Sjølaksefiskarlag ja Bivdu leat čielgasit cealkán ahte regulerenevttohusa ferte rievdadit. Sámediggi lea gulaskuddan sihke Birasdirektoráhtain, mii lea čállán evttohusa, ja Dálkkádat- ja birasdepartemeanttain, geat leat dadjan ahte sii gieđahallet ášši viidáseappot.
– Mu olbmot leat ikte váldán oktavuođa departemeanttain ja šiehttan čoahkkima bearjadahkii, masa mii maiddái háliidivččiimet searvadit mearraluossabivdiid serviid. Sámediggepresideantan bivddán mun dálkkádat- ja birasministara Espen Barth-eide (Bb) guldalit mearraluossabivdiid ja Sámedikki, dadjá Muotka preassadieđáhusas.