Lean aviisabargi mielde leamašan biilamátkkis
Muhtin beaivvi gal muinna manai veaháš hejot. Dahje ii lean gal nu várálaš go dáhpáhuvai nu, mus dat gal lei somá dan dihte!
Ledjen muhtin beaivvi láittastuvvamin ja vulgen olggobeallái váccašit. Olggobealde ledje aviisabargiid biillat bálddabálddalaga. Giccodin biillaid alde ja fuobmájin ahte muhtin biillas lea láse rabas. Mun ruohta njuolga dohko ja suotnjalin sisa. Biillas ledje olu amas hájat. Njuikejin de láhttái. Ledjen jur njoallugoahtán šukkoláda go uksa rahpasii. Háhppehin jávkkihit stuolu vuollái. Guovlladin stuolu guora ja oidnen dat lei okta aviisabargiin gii čohkkedii biilii ja vuoddjái. – Ohoi dette, jurdilin! Gosa son moai dál letne mátkkis?
Vujiime ja vujiime, jierasmuvvagohten go ean oba bisánange! Ammahal dál vudje vel nu guhkás ahte in deaivva šat ruoktot? Maid mun dihten, ii lean eará go velohallat, ii olggos goit sáhte njuiket biillas vuojidettiin.
De viimmat bisáneimme. Vuoddji manai olggos ja mun maid doamihin livkkihit olggos su fárus. Ruhtten tráhpá vuollái ja geahččagohten birra: Fuobmájin ovttatmano ahte dáppe orrot eará sáhpánat.
Fargga iđistii ge unna sáhpánaš ja geahčai imaš čalmmiiguin munnje: – Gii bat don leat?
Muitalin sutnje gii mun lean ja mot muinna lea dáhpáhuvvan. Unna sáhpánaš muitalii ahte báiki gosa lean boahtán lea Njoammelvuovdi! Unna sáhpánaš hásttii mu sisa geahččat iežas duhkorasaid. Sus ledje vaikko man olu smávva biillažat, várra máŋgalogi! Unna sáhpánaš muitalii daid viežžan ránnjáviesu luhtte, doppe orrot bártnážat geat eai láve čorget duhkorasaid vissui go gerget stoahkamis.
– Go eai čorge, de gal mun luoikkahan daid oanehaš! Duhkorattaime guhká. Muhto de gullen olbmá, gean mielde ledjen čuvvon deike, boahtimin olggos. Fertejin doamihit olggos fáktet goas dál rabista fas biilauvssa. Šiehŧadeimme vel sáhpániin ahte sáhtášin eará háve fas čuovvut aviisabargi mielde Njoammelvuovdái vai besse stoahkat.
Ovttatmano go biilauksa rahpasii, de doamihin njuiket fas sisa.
Nu moai vuoddjáime fas ruoktot. Gal dát lei juo somá! Dat han lea dego busse mielde vánddardit! Jurddahallen go veallájin stuolu vuolde ahte eai dáidde mu olbmát ruovttus jáhkkit munnje go muitalan sidjiide otná fearána!