Váiban, muhto buori movttas
Dušše gávcci diimmu maŋŋel go Kristin Harila lei joavdan máilmmi alimus várrái, Mount Everestii, de olahii vel nuppi várrečohkkii. Dat mearkkaša ahte sámi gizzu lea masá beallemuttos iežas máilmmiolahusgeahččaleamis. Mannan maŋŋebárgga čuovganeapmái joavddai Kristin Harila (37) máilmmi alimus várrái, Mount Everestii. Dušše gávcci diimmu maŋŋel olahii maiddái Lhotse mii lea máilmmi njealjádin alimus várrečohkka.
– Kristin Harila bargá ulbmillaččat ja garrasit vai olahivččii iežas mihtuid, lohká várregizzu preassaovddasvástideaddji Rigmor Berthier.
Ánnejohkalaš Kristin Harila áiggošii časkit máilmmiolahusa ja vuollel jahkebealis gizzut buot máilmmi 14 várrái mat leat badjel 8000 mehtera alu.
Ii vuollán
Kristin Harilas lei dat ulbmil jo diibmá, muhto son šattai botket goargŋumiid maŋŋel go koronagáržžidusaid geažil ii ožžon goargŋunlobi guovtti maŋimuš várrái.
– Kristin Harila liiko erenomáš bures luonddus ja sus lea dáhttu iežas hástalit. Vuostebiekkat eai bisset su, dat baicce nannejit ja movttiidahttet su olahit iežas ulbmiliid. Dasa lassin lea dán prošeavttas ceavzilvuohta guovddážis. Sutnje lea dehálaš fuomášuhttit ruskačoaggima váriin, karbonluoitima ja industriija sohkabealvealaheami. Sus lea dáhttu inspireret sihke nieiddaid ja gánddaid, beroškeahttá makkár duogáš sis lea, čuovvut iežaset nieguid ja ulbmiliid, lohká Berthier.
Kristin Harila vuvddii iežas ásodaga Oslos ja heittii jođiheaddjebarggus Skeidaris 2019:s, go háliidii gizzut váriide. Dan rájes lea bidjan iešguđetge olahusaid. Son lea earret eará vuosttaš norgalaš guhte lea gizzon 14 várrái mat leat badjel 8000 mehtera alu ja sus lea máilmmiolahus goargŋut dan guovtti várrái maid olahii dán vahkkus.
Mokta joatkit
Go Ávvir gulahallá preassaovddasvástideddjiin maŋŋebárgga eahkeda, de lea Harila aiddo ollen basecampii.
– Mun lean aiddo háleštan suinna. Son lea aiddo ollen basecampii. Son lea váiban, muhto buori movttas. Dál dárbbaša vuoiŋŋastit go lea gizzon 23 diimmu, lohká preassaovddasvástideaddji Rigmor Berthier.
Son lea rámis Kristin Harilain. – Kristin ii álgán profešunealla várregizzun ovdal go heittii barggustis, eai ge sus lean áktánas goargŋunvejolašvuođat Finnmárkkus gos lea bajásšaddan. Nu ahte son gal birgehallá viehka bures. Jurddaš go giccui ođđa várrái gávcci diimmu maŋŋel go lei olahan Mount Everestii. Son lea maid badjelaš jagis olahan buot 14 várrái mat leat alit go 8000 mehtera.
Čevllohallá sápmelažžan
Go Kristin Harila olaha máilmmi alimus várrečohkaide, de levge sihke sámi ja dáčča leavggain. – Kristinii lea su sámi duogáš hui dehálaš. Son dovdá nana čanastumi sámi kultuvrii ja son háliida olles máilbmái čájehit ahte čevllohallá sápmelažžan. Danin levge maiddái sámi leavggaid go olaha iešguđetge váriide, lohká Berthier.
Dál lea Kristin Harila Nepala oaivegávpogis čohkkemin ođđa searaid ovdal go fas bidjala ođđa várrái.
– Son galgá bosihit Kathmandus moadde beaivvi ovdal go ođđa várri lea fokusis. Boahtte várrečohkkii šaddá sutnje hui erenomáš ollet, go dalle lea beallemuttos iežas máilmmiolahusgeahččaleamis.
Kristin Harilas lea ulbmilin loahpahit máilmmiolahusgeahččaleami borgemánus.