– Lei hui somá v Viimmat vuoitit
Nu lohká Sámi Music Awards 2023 rabas luohká bálkkašumi vuoiti, nuorra sámi artista Lávre. Son lea okta dan njealljásis geat ožžo sierra fuomášumi Álttás mannan lávvordaga.
– Mun lean ovdal leamaš nominerejuvvon guktii. Nu ahte dat lei hui somá viimmat vuoitit. Buorre dovdu dat lea go veahá fuomášuvvo. Vaikko dieđus in dan dihte musihka čále, muhto goitge lea hui somá go earát atnet dan árvvus maid. Dan ovddas mun lean hui giitevaš, dadjá artista Lávre maŋŋá Ávvirii go doalut leat nohkan.
Su gilvaleaddjit rabas luohkás leigga Katarina Barruk ja Yungmiqu dahje Mihkku Laiti.
– Ráhkadan dárkilis geavahanplána
Bálkkašupmi lea diploma ja 10 000 ruvnno. Go Ávvir jearrá rabas luohká vuoitis leat go sus jurdagat mo ávkkástallat ruđaid, de lohká ná:
– Juo, oba somá. Dan in oba ge vuordán ahte ruđat leat das mielde, mojiin vástida son.
Son joatká:
– Mun galggan veahá dutkat dan. Mun oainnat liikon excel-tabellaid ráhkadit. Nu ahte mun ráhkadan hui dárkilis geavahanplána dasa. Muhto mun jurddašan ahte ferten dan lunddolaččat geavahit diŋggaide mat ovddidit mu musihkalaš doaimma. Árvideames juoidá čállima ektui go jo vuiten dan kategoriijas, loahpaha Lávre.
Guovvamánu logát beaivvi čoagganedje musihkkaberošteaddjit Álttá kultursálii Sámi Music Awards 2023-bálkkašumiid juohkindilálašvuhtii mii juhke 6. gearddi 2016 rájes. Sámi Music Awards lea oassin Sami Music Weekas dahje Sámi musihkkavahkkus mii lágiduvvui jo logát geardde. Audioland fitnodat ja fitnodaga eaiggádat Klemet Anders Buljo ja Olga Solyanik leaba dáhpáhusa váldolágideaddjit.
Rukses rátnu lea láhttis, nu go láve go leat allaárvosaš kulturdáhpáhusat. Ceggo maiddái «banner» seainni vuostá mas stuora bustávaiguin čuožžu «Sami Music Week» ja «Sami Music Awards». Dan vuostá olusat govviduvvojedje ja lei dáhpáhusa lágideddjiid ammátgovvejeaddji gii dan dagai.
Nu maiddái olusat iežaset govvidedje. Nu go dát nissonolbmot.
Váile diibmu čiežas kultursáles rahpasedje deháleamos uvssat gos lágideaddjit guossuhedje diibmosaš prográmmas dánsuma, musihka ja juhke Sámi Music Awards 2023 bálkkašumiid. NRK Sámi profiila ja Duolva Duottar joavkku artista Ole Máhtte Gaup láidestii eahkeda.
– In lean vuordán dan
Logai lávddis Ingá-máret Gaup Juuso go almmuhedje ahte son lea árbeguoddi luohká vuoiti.
– Mun gal ferten dadjat ahte das ledje mielde nu garra juoigit, guokte dievdojuoigi geaid anán hui čeahpes juoigin. Dat lea gudni ja somá, in ge duođai ge lean vuordán. Giitosat, giitosat, logai artista lávddis.
– Unnivuođa rájes lávlon ja juoigan
Álttá kultursále Sámi Music Awards 2023 gehččiid gaskkas lei maiddái Ingá-máret Gaup Juuso eadni, Kirsten Elle Gaup Juuso. Son lea hui movtta go nieida oaččui bálkkašumi.
– Dat lea somá. Unnivuođa rájes son lea lávlon ja juoigan. Son lea guhká bargan ja oainnán ahte lea lihkostuvvan dainna, áibbas oanehaččat lohká Kirsten Elle Ávvirii.
– Ánssášii vuoitit
Piera Eira ja John Andre Eira leigga seamma luohkkái nominerejuvvon. Piera Eira lea báikki alde. Ávvirii lohká son maŋŋá ahte ii obage vuordán ahte su nominerejit dán luohkkái.
– Guhkkin eret ahte galggan vuoitit. Mus ledje garra gilvaleaddjit. Ledjen oba sihkar ahte nubbi dan guoktásis vuoitá. Lei ge Ingá-máret Gaup Juuso, ja son ánssašii vuoitit, oanehaččat dajai Piera Eira.
Goalmmádin bođii viežžat Sámi Music Awards bálkkašumi
komponistasuorggi vuoiti Annmari Pettersen Magga. Son lea earet eará komponeren «Rekviem før forsoning» nammasaš orkeasttarbihtá. Dainna barggai klosteris Tsjekkias ja vuosttaščájálmas lei Nikolaigirkus Granvollenis golggotmánu 20. beaivvi 2023.
Son maid giittii lávddis ja logai ge ahte dan ii lean vuordán.
Musihkain bargat viidásit
Sámi Music Awards 2023 loahpahuvvui Nuorra artisttaid luohká bálkkašumi juohkimiin. Dan viežžalii Elina Ijäs. Lávre ja Yungmiqu (Mihkku Laiti) leigga maid nominerejuvvon dán luohkkái.
– Mihkku ja Lávre leaba hui
čeahpes nuorra artisttat. Mun in diehtán obage ahte galggan vuoitit go soai maid ánssášeaba dan. Mun sakka hirpmástuvven go ožžon dán bálkkašumi, lohká artista.
Ijäs lea lohkame musihka Oslos dál ja háliida maid boahttevaš áiggis bargat musihkain.
– Ánssášit gudni
Sámi Music Awards 2023 njeallje bálkkašumi leat ožžon iežá «eaiggádiid». Kultursále guorrana. Ávvir lea deaivan báikkis Sámi Grand Prixa buvttadeaddji Ol Johan Gaupa, guhte ii leat vuos mannan. Mii jearaimet sus maid son jurddaša bálkkašumi vuitiid birra.
– Buot vuoitit leat bargan musihkain. Sii leat bidjan dasa návccaid, ja ánssášit vuoitit. Maiddái dat geat leat nammaduvvon, geat barget luđiin ja sámi musihkain, sii ánssášit maid gudni, vástida diplomáhtalaččat Gaup.
Go Ávvir jearrá lea go su miela mielde vuoitit vai livččii go son sávvan eará artisttaid vuoitit, de lohká ahte buot artisttat leat seamma dásis ánssášeami ektui.
– Das lea iežas sadji musihkkamáilmmis
Sámi Grand Prixa buvttadeaddji Gaup lea čuvvon Sámi musihkkavahkku prográmma mii álggii guovvamánu 6. beaivvi. Son dad
já ahte juohke oktavuođas gos sámi musihkka dahje luohti loktejuvvo, čalmmustahtejuvvo ja ávvuduvvo, de lea ávvudanveara ja čalmmustahttinveara.
– Dan dáfus Sámi Music Weekas lea iežas sadji musihkkamáilmmis. Lea maiddái hui dehálaš ahte mis lea báiki gos gudnejahttet sámi musihka ja luođi. Dat oažžu de fuomášumi, lohká buvttadeaddji Ol Johan Gaup.
– Ráhkadit buori šovva
Doaluid lágideaddji, Klemet Anders Buljo, bosiha oanehaččat ovdal go vuolgit čuovvovaš oassái Sámi musihkkavahkus. Buljo lea váiban, muhto lea duhtavaš Sámi Music Awards lágidemiin vaikko kultursále ii lean áibbas dievva.
– Ovdal pandemiija lei dat hui stuoris. Dál mii ođđasit dan huksegođiimet. Boahtte jagi lea spagga dievva. Mii diehtit dan. Go mis lea ulbmil ráhkadit buori šovva, ja olbmot dihtet ahte dat lea buorre ja profešunealla šovva man mii ráhkadit. Dál, go fas beaggá, de olbmot plánejit boahtte jahkái ahte Sámi Music Awardsii sii vulget, dadjá Buljo.
Guovvamánu 10. beaivvi loahpahuvvui Sámi Music Week gos Elina Ijäs, Tundda Elektro ja KEIINO konsearttaiguin.