NAV sámegielfálaldaga baicce nannet
Telefuvdnanummár gosa riŋge go áigu NAV:S hupmat sámegiela álggahuvvui ođđajagemánu 1. beaivvi dán jagi. Dat lea vuos geahččalanortnet mii bistá njukčamánu 31. beaivvi rádjái. Logut maid NAV leat čohkken čájehit ahte gaskamearálaččat riŋgejit gaskal 70 ja 80 sámegielaga vahkus dán nummarii gos sámegielagiin beassá hupmat NAV vuogádagas.
NAV Ávjovári bargi Johan Mikkel Tornensis lea okta sis gii vástida telefovnna go sámegielagat riŋgejit sámegielat telefonnummárii. Son muitala Ávvirii ahte measta álot loahpaha geavaheaddji ságastallama dainna ahte lohká lei buorre go beasai sámegillii oažžut čilgejuvvot áššiid, ja ieš maid beasai čilget iežas ášši sámegillii. Tornensis dieđuid mielde leat geavaheaddjit hui duhtavaččat, ja muhtumat leat maid lohkan ahte sii eai leat háliidan NAV:I riŋget go šaddá dárogillii čilget iežas earána.
Liikká lea vuos eahpečielggas ahte jotko go dát fálaldat, go lea dušše geahččalanortnet. NAV Oktavuođaguovddáža ossodatdirektevra, Hanne Kristin Lorentsen, muitala Ávvirii ahte sii leat dál árvvoštallame ortnega ja galget go joatkit. Son lohká iežas leat duhtavažžan go orru čájeheame ahte lea ohcaluvvon ortnet go nu máŋggas geavahit dan fálaldaga. Lorentzen aŋkke deattuha ahte son ii mearrit dan okto vaikke lea ge positiiva dasa ahte joatkit fálaldagain.
Min mielas ii leat riekta ii árvvoštallat ge ahte galgá go jotkot fálaldat, go dákkár sámegielfálaldat galggašii leat buot almmolaš ásahusain main lea bargu maid bálvalit sámegielagiid. Ii ge das leat ge sáhka dušše dan birra, ahte son gii vástida telefuvnna máhttá sámegillii vástidit, muhto sis han lea maiddái dat sámikulturmáhttu mii lea seamma dehálaš go giellamáhttu. Dávjá han lea olbmuin earán NAV ásahusain dakkár áššiiguin mat eai soaitte leat nu álkit, nu go buozalmasvuođa dihte dahje lea barggu haga. Eará ge ruhtaáššiiguin bargá NAV, nu go ovdamearkka dihte vealgeáššiiguin, doarjjaortnegiiguin ja nu ain.
Diehttelasat lea álkit gulahallat NAV:IN go beassá iežas gillii čilget ášši olbmui geas maiddái lea kulturmáhttu. Danne lea áibbas čielggas ahte ii berre oba leat ge fáddán heaittihit dán ortnega, muhto baicce hutkat mot dan nannet ja maiddái mot eambbo oahpisin olbmuide. Dát fálaldat ii leat beare ollu oidnon ja beaggán goste ge, nu ahte jáhkkit máŋggas maid oba dieđe ge ahte dákkár sámegielfálaldat gávdno.