– Bealte dušše šoavvá ja sabehat skohpet

BRP čájehii ođđa el-skutera almmolaččat Guovdageainnus, ja oluhat ledje geahččaleame dainna vuoddjit.

– Na dá lea várra boahtteáigi skutermáilmmis maid. Vaikke dát ii soaitte vuos heivet nu máŋgasii, de jáhkán boahtteáiggis šaddet el-skuterat maid buorebut ja olihit guhkkelii ain ovdal dárbbaša láddet, lohká ISAN skutergávppi bargi, Ian Ante Buljo.

Mátkkis

Dál leat ge Brp-njunnošat mátkkis čájeheame boahtte jagi Skidoo ja Lynx skuteriid.

Skuterat ledje báldda bálddalagaid ISAN gávppi šiljus, ja olbmot besse geahččaladdat daid.

Dat skuter mii liikká eanemus fuomášumi oaččui lei ođđa el-skuter maid Lynx lea ráhkadan. Dat lea ožžon nama Lynx Adventure Electric

Lea olu jagiid juo leamašan el-skuter Taiga nammasaš skutermearkkas, muhto dál lea BRP, mii lea Ski-doo, Lynx ja Can-am oktasaš namma, almmuhan iežaset el-skutera.

Ii lossat

Buljo muitala ahte dat el-skuter deaddá 245 kilo, johtá vihtta miilla ain ovdal ferte láddet. Das lea 305 centimehter guhku bealte, ja lea ollislaččat skuter mii manna elrávnnjiin.

Das lea čohkkansadji guovtti olbmui, ja lea muđui oaidnit dego dábálaš skuter.

– Nu go dál lea, de lea sullii seamma deattus go sullasaš skuterat BRP:S main lea 600 Ace mutuvra. Ii leat gal lossat, muhto várra jus galgá joavdat guhkkelii go vihtta miilla, de šaddá stuorát batteriija biddjot ja dalle gal lossu eanet, lohká son.

Eanemus fuomášumi

Buljo muitala ahte olbmot leat viššalit leamašan geahččaladdame daid ođđa skuteriid, muhto lea dat el-skuter mainna buohkat áigot geahččalit.

Dan botta go Ávvira mielbargi lea báikkis, de geahččaladdet olbmot dainna skuteriin.

Muhtun gullui dadjame ahte dan skuteris lea jietna lea dego vinššas go vuodjá, jaskadit dušše njimmá.

– Dán dat háliidit buohkat geahččalit, lohká son ja čohkkeda skutera ala.

– Dat gal lea nu jienaheapme ahte ii gullo eambbo bealte mii šoavvá ja sabehat mat skohpet, go vuodjá.

– Olu máksá?

– Dat máksá 235 000 ruvnno. Soaitá vuos beare oanehažžii joavdat ovdal go batteriija šaddá láddet, mii sáhttá daguhit ahte eai nu olusat oastte dán, muhto gal dat fal buoridit dan maid áiggi mielde. Eahpitkeahttá dát skuter nanne BRP saji skutermárkanis, ja de beassá oaidnit movt ovdána el-skuter skutermáilmmis, lohká Buljo.